मेशी येथे आधारभूत खरेदी किंमतकडे शेतकऱ्यांची पाठ 

मेशी, ता. देवळा : आधारभूत किंमत खरेदी योजनेतर्गत जिल्ह्यात विविध भरडधान्य खरेदी केंद्रांवर यंदा केवळ साडेचार हजार शेतकऱ्यांनी धान्य विक्रीसाठी ऑनलाइन नोंदणी केली आहे. मागील वर्षाच्या तुलनेत पन्नास टक्के शेतकऱ्यांनी देखील या वर्षी खरेदी केंद्रावर नोंदणी न केल्याने या वर्षी शासकीय खरेदी अल्प प्रमाणात होण्याचे संकेत मिळत आहेत. 

शासकीय आधारभूत खरेदी योजनेतील अटी व शर्ती व आधारभूत किमतीत केंद्र शासनाने केलेली अत्यल्प वाढ यामुळेच शेतकऱ्यांनी पाठ फिरवली आहे. मागील वर्षी जिल्ह्यातून मका, ज्वारी व बाजरी च्या आधारभूत किमतीत विक्रीसाठी १०२९८ शेतकऱ्यांनी नोंदणी केली होती. या वर्षी मात्र ४६६९ शेतकऱ्यांनी विक्रीसाठी स्वारस्य दाखविले आहे. त्यात मुख्य पीक असलेल्या मक्याचे बाजारातील दर पाहता आधारभूत १८७० रुपये या दरात किती शेतकरी मका विक्री करतील याबाबत प्रश्‍नचिन्ह आहे. ज्वारी व बाजरीसाठी मालेगाव व येवला तालुका वगळता या वर्षी नोंदणी झाली नाही. मालेगाव येथील खरेदी केंद्रावर १६१ शेतकऱ्यांनी ज्वारीची व ९० शेतकऱ्यांनी बाजरीची नोंदणी केली. येवल्यातही ज्वारी ६५, तर बाजरीची २४४ शेतकऱ्यांनी नोंद केली. 

मकाची आंतरराष्ट्रीय बाजारातील मागणी व देशांतर्गत कुक्कुटपालन व्यवसायाततील मागणी यामुळे मकाचे बाजारातील दर उंच राहण्याची शक्यता आहे. यामुळे मक्याच्या आधारभूत किमतीत शासनाने किमान शंभर रुपयांची तरी वाढ करायला हवी होती. परंतु मागील दाराच्या तुलनेत केवळ वीस रुपयांची वाढ झाल्याने शेतकऱ्यांचा भ्रमानिरास झाला. ज्वारी व बाजरीची देखील बाजारातील आवक व मागणीचा अभ्यास केल्यास बाजरी व ज्वारीची देखील कमी प्रमाणात विक्री होणार असल्याचे जाणकरांचे मत आहे.    प्रतिक्रिया.. ‘‘पिकांच्या उत्पादन खर्चात वाढ झाल्याने शासनाने आधारभूत किमतीत देखील त्याप्रमाणात वाढ केली पाहिजे.आधारभूत किमतीत आत्याल्प वाढीमुळेच शेतकऱ्यांचा नोंदणीस अल्प प्रतिसाद मिळाला.’’  -कृष्णा जाधव, जिल्हाध्यक्ष-प्रहार शेतकरी संघटना  ‘‘शासनाकडून सूचना प्राप्त झाल्यास नोंदणीकृत शेतकऱ्यांचे धान्य खरेदीची प्रक्रिया लवकरच राबविली जाईल.’’  -विवेक इंगळे, व्यवस्थापक-जिल्हा मार्केटिंग फेडरेशन, नाशिक