धरणगाव, जि. जळगाव : पीकविमा परतावे जानेवारी अखेर मिळणार 

धरणगाव, जि. जळगाव : नैसर्गिक आपत्तीने ग्रासलेल्या शेतकऱ्यांना लवकरच पीकविम्याची भरपाई विमा कंपनीकडून मिळणार असल्याची माहिती तहसीलदार नितीनकुमार देवरे यांनी दिली. याबाबत तहसीलदारांच्या दालनात विमा कंपनीचे प्रतिनिधी, कृषी अधिकारी, पदाधिकारी आणि निवडक शेतकऱ्यांची बैठक झाली. यात २८ जानेवारीपर्यंत विमा रक्कम शेतकऱ्यांच्या खात्यात जमा होणार असल्याचे सांगण्यात आले. 

तहसील कार्यालयात तालुकास्तरीय पीकविमा समितीची बैठक तहसीलदार नितीनकुमार देवरे यांच्या अध्यक्षतेखाली झाली. या वेळी धरणगाव तालुक्यातील एकूण ७ हजार ५ शेतकऱ्यांचे पीकविम्याचे पंचनामे झाले असून, ज्या शेतकऱ्यांनी ऑनलाइन अथवा ऑफलाइन तक्रारी दाखल केल्या आहेत, अशा शेतकऱ्यांचे नुकसान यादीतील नावे तपासून आयसीआयसीआय लोम्बार्ड या पीकविमा कंपनीमार्फत शेतकऱ्यांच्या खाती २८ जानेवारीपर्यंत पीकविम्याचे पैसे जमा होणार असल्याचे पीकविमा प्रतिनिधी सागर पाटील यांनी सभेमध्ये सांगितले. तसेच तालुक्यातील उर्वरित शेतकऱ्यांना मार्चअखेर रक्कम कंपनीकडे प्राप्त होताच त्यांनाही याबाबत लाभ मिळणार असल्याचे सांगितले. 

या प्रसंगी गटविकास अधिकारी यांचे प्रतिनिधी संजय देशमुख, तालुका कृषी अधिकारी यांचे प्रतिनिधी संजय कोळी, तसेच शेतकरी प्रतिनिधी तथा पंचायत समिती सभापती प्रेमराज पाटील, सचिन पवार पंचायत समिती सदस्य मुकुंद नन्नवरे आदी उपस्थित होते.