जळगावः अॅग्रोवन व आयसीएल कंपनीतर्फे जमीन सुपीकतेबाबत मार्गदर्शन 

जळगाव ः ॲग्रोवन आणि आयसीएल कंपनीच्या संयुक्त विद्यमाने चोपडा येथील कृषी उत्पन्न बाजार समितीच्या अडावद येथील उपबाजारात (ता. चोपडा, जि. जळगाव) सोमवारी (ता.६) जागतिक मृदा दिनानिमित्त विशेष चर्चासत्राचे आयोजन करण्यात आले. या चर्चासत्रामध्ये ‘जमीन सुपीकता आणि पीक व्यवस्थापन,’ याबाबत डॉ. उल्हास पाटील कृषी महाविद्यालयाचे सहायक प्राचार्य नीलेश सदार व प्रा. मोनिका नाफाडे भावसार यांनी मार्गदर्शन केले.  या वेळी आयसीएल कंपनीचे उपव्यवस्थापक पंडित नीरपने, बाजार समितीचे सभापती दिनकर देशमुख, शेतकरी के.व्ही.देशमुख, बी.के.पाटील, लोणी येथील शेतकरी नरेंद्र मधुकर पाटील, गौरव कासट, पन्नालाल पाटील, अरूण पाटील आदी उपस्थित होते.  प्रा.सदार म्हणाले, बदलत्या हवामानानुसार शेतकऱ्यांनी बदलले पाहिजे. पुढील दिवस शेतीचेच आहेत. त्यासाठी जमीन सुपीकतेवर काम झाले पाहिजे. जमिनीची सुपीकता म्हणजे जमिनीतील अन्नद्रव्यांचा समतोल. अन्नद्रव्ये महत्त्वाची आहेत. पण बदलते वातावरण, खते पाण्याचा अतिवापर यामुळे जमिनीची सुपीकता धोक्यात आली आहे. जमिनीत सेंद्रिय कर्बाचे प्रमाण कमी असून, एकात्मिक अन्नद्रव्य व्यवस्थापन करणे आवश्यक आहे. जमिनीची धूप थांबली पाहिजे. जमिनीची सुपीकता वाढविण्यासाठी पिकांची फेरपालट करावी, पिकांचे अवशेष जमिनीत गाडावेत, हिरवळीच्या खतांचा वापर करावा, रासायनिक खतांचा संतुलित वापर करावा व व एकात्मिक अन्नद्रव्य व्यवस्थापन करावे.’’ प्रा.नाफाडे भावसार म्हणाल्या, ‘‘शेतकऱ्यांनी जमिनीची सुपीकता टिकवण्यासाठी माती परीक्षण करणे आवश्यक आहे, प्राथमिक व दुय्यम मूलद्रव्यांसोबतच सूक्ष्म मूलद्रव्यांची गरज असते. त्यासाठी जीवामृत वापर करावा.’’