सोनगीर, जि.धुळे ः सोनगीर बाजारात भाजीपाला दरांवर दबाव 

सोनगीर, जि.धुळे ः सोनगीर बाजारात भाजीपाल्याची आवक वाढली आहे. त्यामुळे दरात मोठी घसरण झाली आहे. भाजीपाला उत्पादकांना मोठा फटका बसला असून, ग्राहक सुखावला, विक्रेतेही खूष आहेत. मात्र, गेल्या महिन्यात सध्याच्या तुलनेत दुप्पट दर होते. 

यंदा परिसरात चांगला पाऊस झाल्याने अद्यापही विहिरी भरलेल्या आहेत. अधिकाधिक शेतकऱ्यांनी भाजीपाला उत्पादनावर भर दिला. दर वर्षी हिवाळ्यात भाजीपाला कडाडलेला असतो. यंदा मात्र याउलट परिस्थिती आहे. येथील बाजारात सध्या सर्वांत स्वस्त मुळा, तर शेवग्याच्या शेंगांना सर्वाधिक भाव आहे. घाऊक दरात मुळा आठ ते दहा रुपये प्रतिकिलो आहे, तर शेवगा शेंगांचे ८० ते ९० रुपये दर आहेत. बटाटे, काकडी, गाजर, टोमॅटो १५ ते २० व कांदे १० ते २० रुपये किलो आहे. मेथी, कोथिंबीर, कांदापात, दुधी भोपळा २० ते २५ रुपये आहे. वाटाणे, जाड हिरवी मिरची, भरताचे वांगे २५ ते ३० रुपये किलो आहे. वांगी व कोबी गड्डा २५ ते ३५ रुपये किलो आहे. शिंगरी, आंबटचुका, चवळी ३० ते ३५ रुपये, ढेमसे (गोल भेंडी) ३५ ते ४० रुपये, पोकळा, गिलके, भेंडी, फ्लॉवर, दोडकी, बारीक मिरची ४० ते ५० रुपये असे दर आहेत. हे दर घाऊक विक्रीचे असून, किरकोळ दर यापेक्षा दुप्पट किंवा तिप्पट आहेत. त्यामुळे ग्राहकांना कमी दर होऊनही तेवढा फायदा नाही, अशी स्थिती आहे. 

कांद्याने शेतकऱ्यांना रडवले  कांद्याचे भाव अवघे ४०-५० रुपये किलो झाले, तरी भाववाढीची ओरड करणारी मंडळी आता कुठे आहेत, अशी संतप्त विचारणा शेतकरी करीत आहेत. अवघ्या दहा ते १५ रुपये किलो दराने कांदा विक्री होत आहे. त्यामुळे शेतकऱ्यांना भाजीपाल्याच्या घसरलेल्या दराने रडविण्याचे काम जणू केले आहे.