जळगाव ः खानदेशात पावसाचा धुमाकूळ सुरूच आहे. गेल्या १० दिवसांत तीनदा जोरदार ते मध्यम पाऊस विविध भागांत झाला आहे. गेल्या तीन दिवसांत सातपुडा पर्वतात व लगत जोरदार पाऊस झाल्याने कांदा, कापूस पिकाचे नुकसान झाले आहे. पेरणी, कांदा काढणी, मळणीची कामे ठप्प आहेत. कारण पाऊस व पावसाळी वातावरण कायम आहे. अतिवृष्टी किंवा गारपीट कुठेही झालेली नसल्याची माहिती आहे. परंतु पाऊस येत असल्याने शेतकऱ्यांचे नुकसान होत आहे. उघड्यावरील चारा किंवा कडब्याची नासाडी होत आहे. अनेक शेतकऱ्यांचे सूर्यफूल पीक काढणीवर आहे. पण या पिकाचेही पावसाने नुकसान होत आहे. केळी अनेक भागात काढणीवर आहे. परंतु काढणी रखडत सुरू आहे. कारण शेतरस्ते खराब झाले आहेत. तसेच खरेदीदारदेखील नुकसान, विलंब आदी कारणांमुळे काढणीला येत नसल्याचे चित्र आहे. अनेक शेतकऱ्यांनी कांद्याची काढणी केली होती. परंतु कांदा तयार करून तो बाजारात पोहोचविणे अशक्य झाले आहे. कारण पावसामुळे पिकाची नासाडी झाली असून, दर्जावरही परिणाम झाला आहे. कोरड्या वातावरणाची गरज आहे. गेल्या शनिवारी (ता. २०) जळगावमधील यावल, चोपडा, जळगाव, धरणगाव आदी भागांत जोरदार पाऊस झाला. सोमवारीदेखील (ता. २२) पाऊस अनेक भागात झाला. त्यापूर्वी गुरुवारी (ता.१८) मध्यरात्रीनंतर जोरदार पावसाने जळगाव, धरणगाव, एरंडोल, भुसावळ, पाचोरा, चोपडा आदी भागांत हजेरी लावली. कोरडे वातावरण अजूनही तयार झालेले नाही. यामुळे शेतीकामे ठप्प असल्याची स्थिती आहे. कापसावर प्रक्रिया करणारे कारखानेदेखील रखडत सुरू आहेत. कारखान्यांमध्ये साठविलेला कापूस सुरक्षित भागात ठेवण्यात आला आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.