बंगालच्या उपसागरात घोंघावतेय चक्रीवादळ

पुणे : बंगालच्या उपसागरात तयार झालेल्या कमी दाब क्षेत्राची तीव्रता वाढत असल्याने या भागात कमी तीव्रतेचे वादळ (डीप डिप्रेशन) तयार झाले आहे. आज (ता. २५) सायंकाळपर्यंत या भागात चक्रीवादळ घोंघावण्याचे संकेत आहेत. उद्या (ता. २६) संध्याकाळपर्यंत हे चक्रीवादळ दक्षिण ओडिशा आणि उत्तर आंध्र प्रदेशच्या किनाऱ्याला धडकण्याचा इशारा देण्यात आला असून, ही प्रणाली महाराष्ट्राकडे येण्याची चिन्हे आहेत. बंगालच्या उपसागराच्या ईशान्य भागात तयार झालेली कमी दाबाचे क्षेत्राची तीव्रता वाढली असून, आज पहाटे त्याचे कमी तीव्रतेच्या वादळात (डीप डिप्रेशन) रूपांतर झाले आहे. या वेळी ही प्रणाली ओडिशाच्या गोपाळपूरपासून अग्नेयेकडे ५१० किलोमीटर, तर आंध्र प्रदेशच्या कलिंगापट्टणमपासून ५९० किलोमीटर पूर्वेकडे समुद्रात होती. या प्रणालीची तीव्रता वाढत असून आज (ता. २५) दुपारपर्यंत किनाऱ्यालगत चक्रीवादळ घोंघावण्याची शक्यता आहे. ही संभाव्य वादळी प्रणाली आंध्र प्रदेश आणि ओडिशाच्या किनाऱ्यावर असलेल्या विशाखापट्टणम, गोपाळपूर आणि कलिंगापट्टणमजवळ किनाऱ्याला धडकण्याची संकेत हवामान विभागाने दिले आहेत. पूर्व किनाऱ्यालगतच्या असलेल्या समुद्रात शनिवारी (ता. २५) उंच लाटा उसळण्याची शक्यता असून, ताशी ४५ ते ६५ किलोमीटर वेगाने वारे वाहण्याचा इशारा देण्यात आला आहे. रविवारी (ता. २६) सायंकाळपर्यंत ही वादळी प्रणाली किनाऱ्याकडे येणार असून, त्या वेळी ताशी ७० ते ९० किलोमीटर वेगाने वारे वाहण्यासह, पूर्व किनाऱ्यावरील राज्यामध्ये मुसळधार पावसाची शक्यता आहे. पूर्व विदर्भाकडे येणार वादळी प्रणाली उपसागरातील वादळी प्रणालीचा संभाव्य मार्ग पाहता रविवारी (ता. २६) किनाऱ्याला धडकून, उत्तर आंध्र प्रदेश, दक्षिण ओडिशा, छत्तीसगड, तेलंगणातून सोमवारपर्यंत (ता. २७) महाराष्ट्रातील पूर्व विदर्भाकडे येण्याचे संकेत आहेत. किनाऱ्याला धडकल्यानंतर या प्रणालीची तीव्रता कमी होत जाणार असली, तरी या काळात जोरदार वाऱ्यासह मुसळधार पावसाची शक्यता आहे.