अन्य सस्तनापेक्षा उंदराची विचार करण्याची प्रक्रिया वेगळी

दृष्टी किंवा दृश्यावर आधारीत समस्या सोडविण्यासाठी उंदीर हे माणूस, माकडे आणि खारीप्रमाणे दिसणाऱ्या श्रु अशा प्राण्यांपेक्षा वेगळ्याच प्रकारे विचार करत असल्याचे आढळले आहे. या चार सस्तन प्राण्यांच्या तुलनात्मक अभ्यासामध्ये ही बाब समोर आली आहे. हे संशोधन प्राण्यांवर केल्या जाणाऱ्या चाचण्यांचे निष्कर्ष माणसांमध्ये लावताना उपयुक्त ठरू शकेल, असा दावा संशोधकांनी केला आहे. त्याचे निष्कर्ष इ न्युरो या संशोधनपत्रिकेमध्ये प्रकाशित झाले आहे.

ग्रेगोर रेनर आणि त्यांच्या सहकाऱ्यांनी मॅकोक (Macaca fascicularis) आणि खार सदृश ट्री श्रू (Tupaia belangeri) या दोन प्रजातीतील क्षमतांचा फरक मिळवण्याचा प्रयत्न केला आहे. हे दोन्ही प्राणी चमकणाऱ्या प्रकाशामध्ये फरक करू शकतात. मात्र, उंदीर (Rattus norvegicus) चमकणाऱ्या प्रकाशाऐवजी पूर्वी खाण्यासाठी मिळालेल्या ठिकाणावरच अधिक लक्ष केंद्रित करतात. शिकवूनही त्यांच्यामध्ये सुधारणा होत नाही. थोडक्यात, अन्य सस्तन प्राण्याच्या तुलनेमध्ये उंदीर मेंदूचा वापर वेगळ्या प्रकारे करत असल्याचे यातून दिसून येते. उंदीरवर्गीय प्राण्यांतील चेतासंस्था हा मानवासारखीच असल्याने त्यावर प्रयोगशाळेमध्ये चाचण्या केल्या जातात. मात्र, त्यांच्या विचार करण्याच्या पद्धतीमध्ये मूलभूत फरक असल्याने त्याचे निष्कर्ष जसेच्या तसे माणसांमध्ये लावणे योग्य ठरणार नाही. त्याचे रूपांतर करण्यासाठी योग्य प्रारूपाची आवश्यकता यातून पुढे आली आहे.