हवामान बदलाचा युरोपियन देशांना फटका

युरोपमध्ये पाण्याच्या पूर्ततेसाठी अन्य सीमावर्ती देशांवर अवलंबून राहण्याचे प्रमाण ३८ टक्के असून, सुमारे ९८ टक्के कृषी उत्पादने ही आयात केली जात असल्याची बाब वॉटर फूटप्रिंट नेटवर्क संस्थेने प्रकाशित केलेल्या अहवालामध्ये मांडण्यात आली आहे. बदलत्या हवामानामुळे वाढत असलेल्या अवर्षणाच्या स्थितीचा फटका युरोपातील अनेक देशांना जाणवणार आहे. सध्या होत असलेली कृषी उत्पादनाची आयात ही तुलनेने दुष्काळाचा कमी किंवा मध्यम धोका असलेल्या देशातून होत आहे. मात्र, भविष्यामध्ये तीव्र हवामानाच्या स्थितीचा फटका युरोप खंडातील देशांना बसल्याशिवाय राहणार नसल्याचा इशारा या अहवालात देण्यात आला आहे. त्याविषयी माहिती देताना डॉ. इर्तुग इर्सिन यांनी सांगितले, की युरोपीय संघ हा पाण्यासाठी अन्य देशांवर अवलंबून असून, विविध कृषी उत्पादनाची आयात करावी लागते. मात्र, या समस्येकडे तितक्याशा गांभीर्याने अद्याप पाहिले जात नाही. भविष्यामध्ये जागतिक तापमानातील बदलामुळे कृषी उत्पादनाचा तुटवडा पडू शकतो. त्यासाठी तयार राहण्याची आवश्यकता आहे. पाण्याचे महत्त्व अधिक डॉ. इर्सिन आणि त्यांच्या सहकाऱ्यांच्या मतानुसार, युरोपीय संघाद्वारे विविध कृषी उत्पादनांचा विचार केला असता वार्षिक सुमारे ६६८ घन कि.मी. पाण्याचा वापर होतो. त्यातील तिसरा हिस्सा हा आयातीतून भागवला जातो. आयात होत असलेल्या प्रदेशातील पाण्याची कमतरता विचारात घेण्याची आवश्यकता आहे.