ज्वारीचे तणरोधक गुणधर्म भातामध्ये आणण्यात यश

ज्वारीचे तणरोधक गुणधर्म भातामध्ये आणण्यात यश
ज्वारीचे तणरोधक गुणधर्म भातामध्ये आणण्यात यश

ज्वारी पिकामध्ये तणांशी सामना करण्यासाठी उत्सर्जित केल्या जाणाऱ्या रसायनांची निर्मिती अन्य भातासारख्या पिकातही करण्यात अमेरिकी कृषी संशोधन संस्थेतील संशोधकांना यश आले आहे. यामुळे तणांचा प्रादुर्भाव असतानाही पिकाची चांगली वाढ होऊ शकणार आहे. या तंत्रज्ञानाचे पाच पेटंट घेण्यात आले आहेत. तणे किंवा अन्य वनस्पतींना प्रतिसाद देण्याची प्रत्येक वनस्पतींची वेगळी पद्धत असते. ज्वारी पीक हे तणांशी सामना करण्यासाठी विशिष्ट रसायन (सोर्गोलिवन) उत्सर्जित करते. या रसायनामुळे तणाने प्रादुर्भावित असलेल्या जमिनीमध्ये ज्वारी ज्या प्रकारे वाढते, त्या तुलनेत अन्य पिकांच्या वाढीवर मर्यादा येतात. पिकांची फेरपालट करू इच्छिणाऱ्या शेतकऱ्यांच्या समस्येत वाढ होते. अमेरिकी कृषी संशोधन संस्थेच्या ऑक्सफर्ड, मिसीसिपी येथील ‘नॅचरल प्रोडक्ट युटिलायझेशन रिसर्च युनिट’ (NPURU) येथे ज्वारी या वैशिष्ट्यपूर्ण गुणधर्माचा अभ्यास करण्यात येत असून, हे गुणधर्म अन्य पिकांमध्ये रूपांतरित करण्याचा प्रयत्न केला. त्याचा उपयोग जैविक तणनाशकाप्रमाणे होऊ शकतो. अन्य पिकांमध्ये सोर्गोलिवन हे रसायन तयार झाल्यास, तणांशी सामना करणे शक्य होणार असल्याचे एनपीयूआरयू येथील मूलद्रव्यीय जीवशास्त्रज्ञ स्कॉट बेअर्सन यांनी सांगितले. या संशोधनापूर्वी सोर्गोलिवन निर्मिती करणाऱ्या जनुकांविषयी फारसे माहीत नव्हते. एनपीयूआरयू येथील बेअर्सन आणि झिक्विंयांग पॅन यांचा समावेश असलेल्या संशोधकांच्या गटाने या विषयावर काम केले. त्यांना सोर्गोलिवन हे संयुग भातामध्ये टाकण्यात यश आले आहे. हे संशोधन ‘न्यू फायटोलॉजिस्ट’मध्ये प्रकाशित करण्यात आले आहे. या संशोधनाचे दुहेरी फायदे आहेत. १. सोर्गोलिवन असलेल्या पिकांमध्ये तणांच्या नियंत्रणासाठी तणनाशकांचा वापर करण्याची आवश्यकता कमी होईल. पर्यायाने शेतकऱ्यांच्या खर्चात बचत होईल. २. नैसर्गिकरीत्या तयार होणाऱ्या या रसायनामुळे पर्यावरणाला हानी पोचणार नाही.

  • प्राथमिक अभ्यासामध्ये संशोधकांना ज्वारी पिकांमध्ये सोर्गोलिवनचे प्रमाण यशस्वीरीत्या वाढवले आहे. या वाढलेल्या तण नियंत्रक घटकांमुळे तणांसाठी प्रतिकारकता वाढली आहे.
  • त्याच प्रमाणे ज्वारीतील सोर्गोलिवन निर्मिती रोखण्यातही यश मिळवले आहे. त्यामुळे ज्वारीसोबत अन्य आंतरपिकांचाही फेरपालट करणे भविष्यात शक्य होईल.
  • प्रयोगशाळेत सोर्गोलिवन निर्मितीची प्रक्रिया भातामध्येही घडवून आणली आहे. त्यामुळे ज्वारीप्रमाणेच भातामध्येगी तणांशी सामना करण्याची क्षमता वाढणार आहे.
  • Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

    ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

    Related Stories

    No stories found.
    Agrowon
    agrowon.esakal.com