केळी पीक सल्ला

केळी पीक सल्ला
केळी पीक सल्ला

सद्यःस्थितीत नवीन मृगबागेची केळी प्राथमिक वाढीच्या अवस्थेत, कांदे बाग केळी घड कापणीच्या अवस्थेत; तर आंबेबाग (फेब्रुवारी - लागवड) केळी सूक्ष्म घड निर्मितीच्या अवस्थेत आहे. २० ते २५ दिवसांच्या कालावधीनंतर तुरळक प्रमाणात का होईना पावसाला सुरुवात झालेली आहे. वातावरण उष्‍ण, दमट असल्याने केळीवर करपा, पोंगाकूज (इर्विनिया रॉट) रोगाचा प्रादुर्भाव होण्याची दाट शक्यता आहे.

  • नवीन मृगबाग केळीला लागवडीनंतर ७५ दिवसांनी जमिनीतून द्यावयाची नत्राची मात्रा प्रतिझाड ८२ ग्रॅम याप्रमाणे युरिया मधून द्यावी.
  • ठिबकव्दारे लागवडीपासून १ ते १६ आठवडे द्यावयाची खताची मात्रा हजारी ४.५ किलो युरिया, ६.५ किलो मोनो अमोनियम फॉस्फेट व ३ किलो म्युरेट ऑफ पोटॅश प्रतिआठवडा देण्याचा क्रम चालू ठेवावा.
  • फेब्रुवारी महिन्यात लागवड केलेल्या केळी बागेला लागवडीनंतर २१० दिवसांनी जमिनीतून प्रतिझाड ३६ ग्रॅम युरियाची मात्रा द्यावी. तर, ठिबकव्दारे लागवडीनंतर १७ ते २८ आठवडे द्यावयाची खताची मात्रा हजारी १३ किलो युरिया व ८.५ किलो म्युरेट ऑफ पोटॅश दर आठवड्याला देत राहावे.
  • करपा रोगाचा प्रादुर्भाव टाळण्यासाठी बागेत कुठेही पाणी साचू देऊ नये. प्रतिबंधात्मक उपाय म्हणून १ ग्रॅम कार्बेन्डाझिम किंवा २.५ ग्रॅम मॅंकोझेब प्रति लिटर पाण्यात १ मिली स्टिकर मिसळून फवारणी करावी.
  • इर्विनिया रॉट (पोंगा कुज) या जिवाणूजन्य रोगामध्ये केळीचा पोंगा कुजतो, तसेच जमिनीलगत बुंधा कुजतो. या रोगाची लक्षणे दिसताच १०० लिटर पाण्यात ३०० ग्रॅम कॉपर ऑक्सीक्लोराईड, १५ ग्रॅम स्ट्रेप्टोमायसीन*, ३०० मिली क्लोरपायरीफॉस मिसळून या द्रावणाची २०० मिली प्रतिझाड आळवणी (ड्रेचिंग) करावी.
  • कांदेबाग केळीच्या घडांची कापणीयोग्य पक्वतेवर करावी. अधिक पक्व घडांवर फळ माशीचा प्रादुर्भाव होऊ शकतो. प्रादुर्भावग्रस्त केळी गोळा करून नष्ट करावी. फळ माशीचा प्रादुर्भाव झालाच, तर बागेत ५० मीटर अंतरावर मिथील युजेनॉलचे सापळे ठेवून फळ माशीचा बंदोबस्त करावा.
  • नाझेमोद्दीन शेख, ०२५७-२२५०९८६  (केळी संशोधन केंद्र, जळगाव.)

    Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

    ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

    Related Stories

    No stories found.
    Agrowon
    agrowon.esakal.com