कडवंची : पाणंदमुक्‍त रस्त्यांची विकासाला गती

गावशिवारातील सुळकी डोंगराच्या पायथ्याशी माझी शेती. पांदण रस्ते नव्हते त्या वेळी शेतात जायची मोठी अडचण होती. पावसाळ्यात तर अडचणींचा डोंगर असायचा. पण आता या रस्त्यांमुळं शेतात अगदी सहज जाता येते, वाहनही जाऊ शकते. - भीमराव वाहूळ गावशिवारात पहिले रस्तेच नव्हते, पाणंदीच होत्या. शेतात वाहन जात नव्हते. एवढंच काय बैलगाडीही अनेकदा नेता येत नव्हती. पावसाळ्यात मोठे हाल व्हायचे, पण आता या रस्त्यांनी सगळ्या अडचणी सोडविल्यात. - सदाशिव क्षीरसागर
कडवंची : पाणंदमुक्‍त रस्त्यांची विकासाला गती
कडवंची : पाणंदमुक्‍त रस्त्यांची विकासाला गती

रस्ते, पाणी आणि वीज हे शेतीविकासातील महत्त्वाचे घटक. द्राक्ष विस्तार करणाऱ्या कडवंचीमधील ग्रामस्थांनी पाणलोट, विहिरी अन्‌ शेततळ्यांच्या साहाय्याने पाण्याची सोय केली. पण रस्ते नसल्याने शेतमाल वाहतुकीची अडचण होती. ग्रामस्थांनी ही अडचण सुमारे ४२ किलोमीटरचे पाणंदमुक्‍त रस्ते तयार करून दूर केली. त्यामुळे शेती विकासाला गती मिळाली.   

 साधारणपणे ९० च्या दशकापासून कडवंचीमधील शेतकऱ्यांनी गाव सोडून शेतात वास्तव्याला सुरवात केली. परंतू शेतरस्त्याचा मोठा प्रश्न ग्रामस्थांसमोर होता. ही अडचण दूर होण्यासाठी २०११ साल उजाडले. जालन्याचे तत्कालीन जिल्हाधिकारी तुकाराम मुंडे यांच्या कार्यकाळात गावातील पांदणमुक्‍त रस्त्यांच्या कामाला सुरवात झाली. श्रमदान, खर्च करण्याची तयारी, रस्त्याला आवश्‍यकतेनुरूप आपल्या शेतातून वा लगतची जागा देण्याची तयारी शेतकऱ्यांनी दाखविली. यामुळे अल्पावधीत शेतशिवारात सुमारे ४२ किलोमीटर पांदणमुक्‍त रस्त्यांचे जाळे विणले गेले. रस्ते नव्हते त्या वेळी व्यापाऱ्यांना धान्य, द्राक्ष, डाळिंब क्रेट मुख्य रस्त्यापर्यंत वाहतूक करून आणून द्यायला लागायचे. रस्त्यांच्या निर्मितीनंतर आता व्यापारी थेट बांधावर जाऊन द्राक्षाची खरेदी करतात. यामुळे शेतकऱ्यांचे श्रम आणि अतिरिक्त खर्चही वाचला. शिवाय शेतात बांधलेल्या घरापर्यंत बिनदिक्‍कतपणे जाणे शक्‍य होऊ लागले. आजघडीला हंगामामध्ये दर दिवशी ३० ते ५० टन द्राक्षाची वाहतूक करण्यासाठी या रस्त्यांवरून वाहने थेट शेतात जातात. शेती कामासाठी कोणतेही यंत्र नेण्यासाठी अडचण येत नाही.  

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com