तरुणांनो, मार्केटिंग आणि निर्यातीवर भर द्या ः गोविंद हांडे

बालेवाडी, जि. पुणे (विशेष प्रतिनिधी) : तरुण शेतकऱ्यांनी दर्जेदार द्राक्ष उत्पादनातून जागतिक बाजारपेठेत स्थान मिळविले आहे. त्यात वाढ होण्यासाठी मार्केटिंग आणि निर्यातीवर भर द्या, असे आवाहन शेतमाल आयात निर्यात सल्लागार डॉ. गोविंद हांडे यांनी केले. राज्य द्राक्ष अधिवेशनात शुक्रवारी (ता. २४) आयोजित ‘द्राक्ष निर्यातीच्या संधी’ या विषयावरील चर्चासत्रात ते बोलत होते. श्री. हांडे म्हणाले की, आजच्या आधुनिक तंत्रज्ञानाच्या युगात शेतीचे स्वरूपही बदलले आहे. तरुण शेतकऱ्यांनी हे बदल स्विकारीत उत्पादनात क्रांती केली आहे. येत्या काळात शेतकऱ्यांनी उत्पादनाबरोबरच पिकाचे मार्केटिंग व निर्यात यावर लक्ष केंद्रीत करावे ही काळाची गरजही आहे. यात वाढत्या संधीही आहेत.

रेसिड्यू रिपोर्ट मिळावा ऑनलाइन रेसिड्यू रिपोर्ट हा निर्यातदारांकडून तत्काळ उत्पादकांना मिळणे बंधनकारक आहे. मात्र, काही निर्यातदार त्याबाबत पारदर्शकता दाखवत नसल्याची तक्रार शेतकऱ्यांची आहे. ही प्रक्रिया ऑनलाइन करण्यात यावी. द्राक्ष उत्पादकांना त्याच्या उत्पादनाचा रिपोर्ट त्यातून मिळावा, अशी मागणीही `अपेडा'कडे करण्यात आली असल्याचे हांडे यांनी सांगितले.