बाजार आधारित शेती उत्पादनाची गरज ः दिवसे

पुणे  : कृषी खात्याच्या माध्यमातून आगामी काळात राज्य शासनाचे ‘स्मार्ट शेती’ संकल्पनेवर भर देण्याचे धोरण आहे. येत्या काळात शेती ही उत्पादन आधारित नव्हे तर बाजार आधारित करण्याची आवश्यकता आहे. बाजाराची गरज, बाजाराला काय लागते याचा विचार करून शेतीच्या तंत्रात बदल करण्याचा, त्यानुसार ज्ञानाचा वापर करण्यावर भर देणारे धोरण राबवण्याचा कृषी खात्याचा प्रयत्न असल्याचे राज्याचे कृषी आयुक्त सुहास दिवसे यांनी सांगितले. ॲग्रोवन स्मार्ट ॲवॉर्ड वितरण सोहळ्यात ते प्रमुख पाहुणे म्हणून बोलत होते.

या वेळी सुहास दिवसे यांच्या हस्ते मराठवाडा विभागाचा स्मार्ट शेतकरी पुरस्कार निपाणी (जि. उस्मानाबाद) येथील प्रयोगशील शेतकरी राजशेखर पाटील यांना प्रदान करण्यात आला. राजशेखर पाटील यांनी कायमस्वरूपी दुष्काळी जिल्हा असलेल्या उस्मानाबादच्या फोंड्या माळावर तब्बल ५५ एकरांत बांबू लागवडीचा अनोखा प्रयोग केला आहे. बांबू शेती आणि फळबागेच्या माध्यमातून त्यांनी दुष्काळी पट्ट्यात शाश्वत शेतीचे यशस्वी मॉडेल उभे केले आहे.  या वेळी मनोगतामध्ये आयुक्त दिवसे म्हणाले, राज्यातील शेतकरी प्रतिकूल परिस्थितीतून वाटचाल करीत आहेत. गेल्या पाच वर्षापैकी तीन वर्षे निसर्ग परीक्षा घेत आहे, तरीसुद्धा जिद्द, कल्पकता आणि मेहनतीने राज्यातील शेतकरी शेती करीत आहेत. गुणगौरव केलेल्या या स्मार्ट शेतकऱ्यांच्या कर्तृत्वाला दाद द्यावी असे शेतकरी निवडले, ही विशेष आणि कौतुकाची बाब आहे. शेतकऱ्यांच्या या यशकथा इतर शेतकऱ्यांना उभारी देणाऱ्या, ऊर्जा देणाऱ्या आहेत. फक्त शेतकऱ्यांना नजरेपुढे ठेवून एखादे दैनिक सुरू करणे ही संकल्पनाच मुळी क्रांतिकारी आहे.

ते पुढे म्हणाले, राज्याच्या कृषी आयुक्तपदाची सूत्रे घेऊन मला तीन महिने झाले. कृषी खात्याच्या माध्यमातून राज्य शासनाने स्मार्ट शेती संकल्पनेवर भर देण्याचे धोरण अंगीकारले आहे. त्याअनुषंगाने कृषी खात्यात काम सुरू आहे. येत्या काळात शेती उत्पादन आधारित नाही तर बाजार आधारित करण्याची आवश्यकता आहे. जागतिक बँकेच्या मदतीने हा स्मार्ट कार्यक्रम राज्यभर सुरू केला आहे. तसेच येत्या काळात शेती उत्पादनांना प्रभावी मार्केटिंगची जोड देऊन खासगी उद्योग, व्यापार जगतासोबत मूल्यवर्धन साखळी निर्माण करण्यावर भर दिला जाईल.