येळेगाव, वांगी परिसरातील ग्रामस्थांना `कोरोना`ची धास्ती

सोलापूर  ः सोलापूर जिल्ह्यात कोरोनाचा संशयित रुग्ण सुदैवाने अद्याप सापडलेला नाही. पण दक्षिण सोलापुरातील येळेगाव, वांगी परिसरातील एका बेदाणा शेडवर ग्वाल्हेर (मध्यप्रदेश) येथील एक कामगार कोरोना पॅाझिटिव्ह आढळला. सध्या हा मजूर त्याच्या गावी मध्यप्रदेशमध्ये आहे. पण पंधरवड्यापूर्वी त्याच्या संपर्कातील सर्वांची तपासणी जिल्हा प्रशासनाने सुरु केल्याने परिसरातील पाच ते सहा गावात ‘कोरोना’ची चांगलीच धास्ती बसली आहे. त्यामुळे या भागात चिंतेचे वातावरण आहे. पण जिल्हाधिकारी मिलिंद शंभरकर यांनी घाबरु नका, योग्य ती तपासणी झाल्यानतंरच चित्र स्पष्ट होईल, असे सांगितले आहे.  

ग्वाल्हेरमध्ये तिथल्या जिल्हा प्रशासनाला दोनच दिवसांपूर्वी हा रुग्ण कोरोना संशयित आढळला. तिकडून तातडीने जिल्हा प्रशासनाला माहिती मिळाली. वांगी, येळेगाव, गावडेवाडी हा परिसर जिल्हा प्रशासनाने सील केला. तसेच या गावाला जाणारे सर्व रस्ते सील केले. तसेच गावातील एकालाही बाहेर आणि आत सोडले जात नाही. अतिशय वेगाने प्रशासनाने या भागातील अडीच हजारांहून अधिक लोकांची तपासणी केली. विशेष म्हणजे आत्तापर्यंत सोलापूर जिल्ह्यात एकही ‘कोरोना’चा रुग्ण आढळलेला नाही. पण इथून गेलेला कामगार कोरोना पॅाझिटिव्ह आढळल्याने चिंता वाढली. महादेव पांगळे आणि खांडेकर यांच्या बेदाणा शेडवर हा कामगार कामावर होता. हा कामगार इथे वास्तव्यास असताना कोणा कोणाला भेटला, याचीही माहिती घेण्यात येत आहे.

त्यामुळे या परिसरात सध्या चिंतेचे वातावरण असले, तरी तालुक्यातील अन्य गावांत मात्र ‘कोरोना’ची चागंलीच धास्ती बसली आहे. या कामगारासोबत काम करणाऱ्या आणि त्याला भेटलेल्या कामगारांची तपासणी सुरु आहे. पण पंधरा दिवसापूर्वी तो ग्वाल्हेरला गेला. त्या दरम्यान इथल्या एकालाही अशी कोणतीच लक्षणे आढळली नाहीत. बहुधा प्रवासादरम्यान संबंधित कामगाराला त्याची लागण झाली असावी, असे वैद्यकीय पथकाला वाटते. पण आता बहुतेकांचे नमुने तपासणीस घेतले आहेत. त्याच्या तपासणी अहवालानंतरच त्याबाबतचे चित्र स्पष्ट होईल. पण तूर्त तरी ग्रामस्थ घाबरून गेले आहेत.