राष्ट्रीयीकृत बॅंकेत खाते उघडण्यासाठी दोन महिन्यांची मुदत देण्याची मागणी

मुंबई : राज्य सरकारने कर्मचाऱ्यांना वेतनासाठी राष्ट्रीयीकृत बँकेतच खाते उघडण्याची सक्ती केली आहे. पण लॉकडाउनमुळे अनेक कर्मचाऱ्यांना राष्ट्रीयीकृत बँकेत नवीन खाते उघडता आलेले नाही. परिणामी एप्रिल महिन्याचे वेतन लांबणीवर पडण्याची भीती असून वेतनासाठी राष्ट्रीयीकृत बँकेत खाते उघडण्यासाठी सरकारने दोन महिन्यांची मुदत वाढवून द्यावी, अशी मागणी बृहन्मुंबई राज्य सरकारी कर्मचारी संघटनेने केली आहे.
संग्रहित छायाचित्र
संग्रहित छायाचित्र

मुंबई  : राज्य सरकारने कर्मचाऱ्यांना वेतनासाठी राष्ट्रीयीकृत बँकेतच खाते उघडण्याची सक्ती केली आहे. पण लॉकडाउनमुळे अनेक कर्मचाऱ्यांना राष्ट्रीयीकृत बँकेत नवीन खाते उघडता आलेले नाही. परिणामी एप्रिल महिन्याचे वेतन लांबणीवर पडण्याची भीती असून वेतनासाठी राष्ट्रीयीकृत बँकेत खाते उघडण्यासाठी सरकारने दोन महिन्यांची मुदत वाढवून द्यावी, अशी मागणी बृहन्मुंबई राज्य सरकारी कर्मचारी संघटनेने केली आहे.  

‘कोरोना’च्या पार्श्वभूमीवर  राज्य सरकारने मार्च महिन्याचे ७५ टक्के वेतन कर्मचाऱ्यांना दिले आहे. त्यातच राज्याच्या वित्त विभागाच्या १३  मार्च २०२० रोजीच्या एका शासन निर्णयानुसार सर्व सरकारी कर्मचाऱ्यांचे वेतन फक्त राष्ट्रीयीकृत बँकेमार्फत अदा करावेत, असे आदेश जारी केले.

खरेतर गेली अनेक वर्षे सरकारच्या नियमानुसार राष्ट्रीयीकृत बँकांबरोबरच काही निवडक  खासगी बँकांमधून कर्मचाऱ्यांचे पगार देण्यात येतात. सरकारने राष्ट्रीयीकृत बँकेच्या खात्यात वेतन जमा करण्याचा निर्णय घेतल्यानंतर  राज्यात लगेच लॉकडाउन सुरु झाल्याने अनेक शासकीय विभागांना बँक खाते राष्ट्रीयीकृत बँकेत बदलण्याची कार्यवाही करता आलेली नाही. वास्तविक अशा परिस्थितीत वित्त विभागाने  राष्ट्रीयीकृत बँकेमार्फतच वेतन देण्याच्या शासन निर्णयाला किमान दोन महिने मुदतवाढ देणे अपेक्षित होते.

या उलट २४  एप्रिलच्या परिपत्रकान्वये सर्व कर्मचाऱ्यांना राष्ट्रीयीकृत बँकेत खाते उघडणे सक्तीचे केले असून त्याशिवाय पगार मिळणार नसल्याचे स्पष्ट केले आहे. आता संचारबंदीच्या काळात राष्ट्रीयिकृत बँकेत  नवीन खाते कसे उघडावे, असा प्रश्न लाखो सरकारी कर्मचाऱ्यांना पडला आहे. या कारणाने एप्रिल महिन्याचे वेतन लांबणीवर पडण्याच्या भीतीने कर्मचारी हवालदिल झाले आहेत. ही अडचण लक्षात घेऊन सरकारने आपल्या निर्णयाचा फेरविचार करून राष्ट्रीयीकृत बँकेत खाते उघडण्यासाठी दोन महिन्यांची मुदतवाढ द्यावी,  अशी विनंती बृहन्मुंबई राज्य सरकारी कर्मचारी संघटनेचे सरचिटणीस अविनाश दौंड यांनी मुख्यमंत्री उद्धव ठाकरे आणि  अर्थमंत्री अजित पवार यांना पत्राद्वारे केली आहे.

अजूनही ऍक्सिस बँकेत खाती मुंबईतल्या चारही राज्य सरकारी रुग्णालयातील कर्मचारी आणि पोलीस ‘कोरोना’च्या विरोधात रात्रंदिवस लढा देत असून या सर्वांची पगाराची खाती ऍक्सिस या खासगी बँकेत आहेत. या सर्व कर्मचाऱ्यांना वेळेवर पगार मिळणे अतिशय आवश्यक आहे, याकडेही संघटनेने सरकारचे लक्ष वेधले आहे.  

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com