वाशीम जिल्ह्यात येण्या-जाण्यासाठी ई-पास आवश्यक 

वाशीम  : सध्या एकही कोरोनाबाधित रुग्ण नसलेल्या वाशीम जिल्ह्यात कडक प्रतिबंधात्मक उपाययोजना राबविल्या जात आहेत. जिल्ह्यात येण्यासाठी तसेच जिल्ह्यातून राज्यातील कोणत्याही जिल्ह्यात जाण्यासाठी मजूर, कामगार, पर्यटक, भाविक, विद्यार्थी व इतर व्यक्तींनी ई-पास प्राप्त करून घेणे अनिवार्य आहे.

यासाठी https://covid19.mhpolice.in या संकेतस्थळावर ऑनलाईन अर्ज करून इ-पास घरबसल्या प्राप्त करून घेण्याची सुविधा निर्माण करून देण्यात आली आहे, अशी माहिती जिल्हा प्रशासनाने दिली आहे.  या संकेतस्थळावर ई-पास मिळविण्यासाठी अर्ज करताना सुरुवातीला ‘जिल्हा/पोलीस आयुक्तालय’ या पर्यायाच्या ठिकाणी तुम्ही सध्या ज्या जिल्ह्यात अथवा पोलीस आयुक्तालय क्षेत्रात अडकलेले आहात त्या जिल्हा अथवा शहराची निवड करावी. त्यानंतर अर्जामध्ये नमूद माहिती अचूकपणे भरावी.

संकेतस्थळावर ऑनलाईन अर्ज भरताना फोटो, आधारकार्ड अथवा फोटो असलेले ओळखपत्र तसेच कोविड-१९ विषयक लक्षणे नसल्याचा वैद्यकीय तपासणी अहवाल स्कॅन करून अपलोड करणे अनिवार्य आहे. ऑनलाइन अर्ज भरल्यानंतर मिळणारा टोकण क्रमांक जतन करून ठेवा. तुम्ही सध्या जेथे अडकलेले आहात तेथील जिल्हा प्रशासनाने मान्यता दिल्यानंतर तुम्हाला याच संकेतस्थळावर इ-पास उपलब्ध होईल. अर्ज भरल्यानंतर मिळालेला टोकन क्रमांक टाकल्यानंतर हा ई-पास आपणास प्राप्त करून घेता येईल. प्रवासामध्ये या इ-पासची प्रिंट सोबत ठेवणे आवश्यक आहे.