कृषी पदव्युत्तर पदवी प्रवेशाच्या सामाईक परीक्षेचा निकाल जाहिर

पुणे  : महाराष्ट्र कृषी विद्यापीठ परीक्षा मंडळामार्फत चारही कृषी विद्यापीठांच्या २०२०-२१ या वर्षातील पदव्यत्तर पदवी प्रवेशासाठी १४ ते १६ मार्च या कालावधीत सामाईक प्रवेश परीक्षा घेण्यात आली होती. या परीक्षेचा निकाल रविवारी (ता.२८) जाहिर करण्यात आला. यामध्ये परभणी येथील वसंतराव नाईक मराठवाडा कृषी विद्यापीठातील कृषी विद्याशाखेचा विशाल सरवदे ८३ टक्के तर पुण्यातील उद्यानविद्या शाखेतील मयुर माने ७८.५० टक्के गुण मिळवून प्रथम आले आहेत.

यंदा दहा विषयांसाठी एकूण १८ हजार १८४ विद्यार्थ्यांपैकी १४ हजार ५०७ विद्यार्थ्यांनी प्रवेश परीक्षा दिली होती. परीक्षा मंडळामार्फत महाराष्ट्र कृषी शिक्षण व संशोधन परिषदेच्या http://mcaer.org या संकेत स्थळावर शनिवारपासून (ता.२७) निकाल जाहिर करण्यात आला आहे. विद्यार्थी आपले गुणपत्रक संकेत स्थळावरून डाऊनलोड करून घेऊ शकतात. तसेच निकालाबाबत शंका असल्यास विहित फी भरून कार्यालयीन सात दिवसांच्या आत निकाल जाहिर झाल्यापासून फेर तपासणीसाठी महाराष्ट्र कृषी विद्यापीठ परीक्षा मंडळाच्या नियंत्रक विभागात अर्ज करता येतील. परीक्षा मंडळाने यावर्षी परीक्षा प्रक्रिया पारदर्शकपणे पार पाडल्याने चालू वर्षी कृषी शिक्षण व संशोधन परिषदेला जून - जुलैमध्ये पदव्युत्तर अभ्यासक्रम प्रवेश प्रक्रिया सुरू करणे शक्य होईल.

पदव्युत्तर पदवीच्या सामाईक प्रवेश परीक्षेसाठी कृषी शाखेतील सर्वाधिक १० हजार ५० विद्यार्थी बसले होते. उद्यानविद्या, वनशास्त्र, कृषी अभियांत्रिकी, अन्नतंत्रज्ञान, गृहविज्ञान, मत्स्यशास्त्र, कृषी जैवतंत्रज्ञान, कृषी व्यवसाय व्यवस्थापन, काढणीपश्चात व्यवस्थापन शाखेतील विद्यार्थ्यांनी ही परीक्षा दिली. वनशास्त्र शाखेतील ललितकुमार मौर्या हा ७८.०० टक्के, कृषी अभियांत्रिकीतील विजय शिंदे ७६.०० टक्के, अन्नतंत्रज्ञान विभागातील राधा लोळगे ७७.५० टक्के, गृहविज्ञान विभागातील मीरा शिंदे ७९.५० टक्के, मत्स्यशास्त्र विभागातील प्रकाश पटेकर ७९.०० टक्के, कृषी जैवतंत्रज्ञानमधील तुषार धनगरे ८५.००, कृषी व्यवसाय व्यवस्थापन शाखेतील अक्षय चिखले ६४.०० टक्के, काढणी पश्चात तंत्रज्ञान शाखेतील किरण खोमणे ६४.५० गुण मिळवून प्रथम आले आहेत, अशी माहिती परिक्षा नियंत्रक डॉ. आर. के. रहाणे यांनी दिली.