नगर जिल्ह्यातील चार ठिकाणे ‘हॉटस्पॉट’

नगर  ः कोरोना विषाणूचा प्रादुर्भाव रोखण्यासाठी प्रतिबंधात्मक उपाययोजनेचा एक भाग म्हणून नगर शहरातील मुकुंदनगर, आलमगीर तसेच नाईकवाडापुरा (संगमनेर शहर), जामखेड शहर ही चार ठिकाणे हॉटस्पॉट केंद्रे म्हणून जिल्हा प्रशासनाने जाहीर केले आहे. या ठिकाणाचा दोन किलोमीटर परिघ कोअर एरिया म्हणून घोषित केला आहे. या ठिकाणी जिल्हा प्रशासनाकडून प्रतिबंधात्मक उपाययोजना केल्या जात असून सर्व आस्थापना, दुकाने, अत्यावश्यक सेवा वस्तु विक्री शुक्रवारपासून (ता.१०) ते  मंगळवारपर्यंत (ता. १४) बंद ठेवण्यात येणार आहेत. जिल्हाधिकारी राहुल द्विवेदी यांनी हे आदेश काढले आहेत. 

कोरोना विषाणूचा संसर्ग झालेले अधिक रुग्ण ज्या भागात सापडले आहेत त्या नगर शहरातील मुकुंदनगर, आलमगीर तसेच नाईकवाडापुरा (संगमनेर शहर), जामखेड शहर ही चार ठिकाणे हॉटस्पॉट केंद्रे म्हणून जिल्हा प्रशासनाने जाहीर केले आहेत. या आदेशाची अंमलबजावणी करण्यासाठी जिल्हा प्रशासनाने दिलेल्या आदेशाप्रमाणे कार्यवाही केली जाणार असून जीवनावश्यक वस्तुंची व्हेंडर पथके तयार करून खरेदी व विक्री, वाहतूक आदी बाबींचे सूक्ष्म नियोजन केले आहे.

संबंधित ठिकाणी उपविभागीय अधिकारी हे संनियंत्रण अधिकारी म्हणून कामकाज पाहत आहेत. या भागात मंगळवारपर्यंत सर्व आस्थापना, दुकाने, अत्यावश्यक सेवा वस्तू विक्री बंद राहणार असून कोणत्याही वाहनांना आणि व्यक्तीला कोणत्याही कारणाने प्रवेश नसेल. त्याभागात कामावर असलेल्या कर्मचाऱ्यांनाही तिकडेच राहावे लागणार आहे. आदेशाचे उल्लंघन झाल्यास कडक कारवाई करण्याचा इशारा प्रशासनाने दिला आहे.