पुणे जिल्हा परिषदेच्या कर्मचाऱ्यांमध्ये कामांबाबत संभ्रम

पुणे  : ‘कोरोना’च्या वाढत्या प्रादुर्भावाला रोखण्यासाठी शासनाने कडक पावले उचलली आहेत. दुसरीकडे वित्तीय वर्ष  मंगळवारी (ता.३१) संपणार असल्याचे आदेश राज्याच्या वित्त विभागाने काढले आहेत. शासकीय कार्यालयातील कर्मचाऱ्यांची संख्या कमी केल्याने काम करणे अवघड झाले आहे. आता ‘कोरोना’च्या संदर्भात दिलेली कामे अगोदर करायची की विभागातील वित्तीय वर्षाची कामे पूर्ण करायची अशी संभ्रमावस्था जिल्हा परिषद अधिकारी व कर्मचाऱ्यांमध्ये निर्माण झाली आहे.

सध्या कोरोना विषाणूच्या पार्श्वभूमीवर उपाययोजना करण्यासाठी प्रशासनाने कंबर कसली आहे. दररोज शासन याबाबत विविध आदेश काढून त्याची कार्यवाही करत आहे. ‘कोरोना’च्या संदर्भात जिल्हा परिषदेच्या सर्वच विभागांना कामे दिल्याने सर्व अधिकारी, कर्मचारी त्यामध्ये व्यस्त आहेत. अल्प कर्मचाऱ्यांसह जिल्हा परिषदेतील विभागांमधील कामकाज सुरू आहे, त्यातच आता राज्याच्या वित्त विभागाचे अप्पर मुख्य सचिवांनी २०१९-२० चे वित्तीय वर्ष ३१ मार्च २०२० ला संपणार असल्याचे आदेश जारी केला आहे.

एकीकडे शासन कार्यालयातील गर्दी कमी करण्यासाठी विविध उपाययोजना करीत आहे तर दुसरीकडे असे आदेश काढून अधिकारी व कर्मचाऱ्यांना कामे सांगत आहे. त्यामुळे नेमके कोणते काम करायचे असा प्रश्न अधिकारी व कर्मचाऱ्यांपुढे आहे.

कार्यालयांमध्ये कर्मचाऱ्यांची वानवा राज्य शासनाने अगोदर शासकीय कार्यालयातील गर्दी टाळण्यासाठी कर्मचाऱ्यांची उपस्थिती पाच टक्क्यांवर आणली. शासकीय कार्यालयाशी होणारे पत्रव्यवहार ऑनलाइन करण्याचे आदेशही दिले. त्यामुळे सर्व शासकीय कार्यालयांमध्ये अधिकारी व कर्मचाऱ्यांची वानवा आहे. वरिष्ठ कार्यालयाला एखादी शासकीय माहिती देण्याची झाल्यास कार्यालयांमध्ये लिपीकसुद्धा दिसेनासे झालेत. त्यामुळे माहिती द्यायची कशी असा प्रश्न कार्यालय प्रमुखांसह अधिकाऱ्यांना पडला आहे. ----