दोन लाखांवर नागरिकांनी घेतला शिवभोजन थाळीचा आस्वाद

‍मुंबई  : गरजू नागरिकांना सवलतीच्या दरात भोजन उपलब्ध व्हावे, यासाठी प्रजासत्ताकदिनाचे औचित्य साधून राज्यात शिवभोजन योजनेची अंमलबजावणी सुरू झाली. ११ फेब्रुवारीला योजनेच्या अंमलबजावणीस १७ दिवस पूर्ण झाले. या १७ दिवसांच्या कालावधीत राज्यातील २ लाख ३३ हजार ७३८ नागरिकांनी शिवभोजन थाळीचा आस्वाद घेतला आहे. या योजनेतून राज्यात १३९ शिवभोजन केंद्रे सुरू झाली आहेत.

मुख्यमंत्री उद्धव ठाकरे यांच्या संकल्पनेतून साकार झालेल्या शिवभोजन योजनेला राज्यात चांगला प्रतिसाद मिळत आहे. प्रजासत्ताकदिनी योजना सुरू झाल्यानंतर पहिल्या आठ दिवसांच्या कालावधीतच म्हणजे २ फेब्रुवारीपर्यंत शिवभोजन थाळीचा लाभ घेणाऱ्यांची संख्या १ लाख ५ हजार ८८७ होती. आता ११ फेब्रुवारीपर्यंत त्यात आणखी एक लाखांहून अधिक लाभार्थ्यांची वाढ झाली आहे. शिवभोजन योजनेतून जेवण देताना स्वच्छता, टापटीप आणि जेवणाचा दर्जा उत्तम राहावा यासाठी मुख्यमंत्री ठाकरे स्वत: या योजनेच्या अंमलबजावणीवर लक्ष ठेवून आहेत. 

मुख्यमंत्र्यांनी साधला संवाद मुख्यमंत्री उध्दव ठाकरे यांनी काही दिवसांपूर्वी योजना सुरू झाल्यानंतर शिवभोजन केंद्रात जेवण घेत असलेल्या नागरिकांशी व्हिडिओ कॉन्फरसिंगच्या माध्यमातून थेट संवाद साधला होता. जेवणाबाबत समाधानी आहात का, जेवणाची चव व्यवस्थित आहे का, काही सूचना असल्यास सांगण्याचे आवाहनही त्यांनी नागरिकांना केले होते. त्यावर जेवण छान आहे, अशी प्रतिक्रिया योजनेतून थाळीचा लाभ घेणाऱ्या नागरिकांनी व्यक्त केली होती.