पालघर जिल्हा पुन्हा भूकंपाने हादरला 

मुंबई  ः पालघर जिल्हा रविवारी (ता.५) रात्री पुन्हा भूकंपाने हादरून गेला. रात्री १२ वाजून १८ मिनिटांनी डहाणू आणि तलासरी तालुक्यात भूकंपाचे धक्के बसले. रिश्टर स्केलवर या भूकंपाची तीव्रता ३.१ एवढी नोंदवण्यात आली. भूकंपाचे धक्के बसताच अनेकांनी भीतीपोटी घराबाहेर धाव घेतली. त्यामुळे या दोन्ही तालुक्यात रस्त्यांवर मोठी गर्दी जमली होती. भूकंपामुळे कोणतीही जीवितहानी झाली नसली तरी अनेक घरांना तडे गेल्याचे सांगितले जाते. 

गेल्याच आठवड्यात बुधवारी पालघरमध्ये रात्री १२ वाजून ३९ मिनिटांनी भूकंपाचा धक्का बसला होता. त्यानंतर पुन्हा शुक्रवारी रात्री ११ वाजता भूकंपाचा दुसरा धक्का बसला होता. लागोपाठ दिवसाआड भूकंपाचे धक्के बसल्याने पालघरमधील रहिवासी घाबरलेले असतानाच रविवारी रात्रीही भूकंपाचा धक्का बसल्याने येथील रहिवाशांमध्ये भीतीचे वातावरण निर्माण झाले आहे. भूकंपाचे जोरदार धक्के बसल्याने डहाणू आणि तलासरी तालुक्यातील सावरोली, बोरमाळ आणि कोचाराई आदी ठिकाणचे ग्रामस्थ भीतीने घराबाहेर पडले. यामुळे या दोन्ही तालुक्यांत रस्त्यांवर मोठी गर्दी झाली होती. या भूकंपामुळे येथील घरांना तडे गेल्याने नागरिक अधिकच घाबरले. त्यामुळे येथील नागरिकांनी संपूर्ण रात्र जागून काढली. 

दरम्यान, ‘कोरोना’च्या भीतीने घराबाहेर पडण्यास असलेली मनाई आणि दुसरीकडे भूकंपामुळे निर्माण झालेली दहशत यामुळे पालघर जिल्ह्यातील नागरिकांची चांगलीच कोंडी झाली आहे.