कृषी सहसंचालकपदाचा पदभार तात्पुरता नाईकवडींकडे

पुणे  : राज्याच्या ‘पोकरा’ प्रकल्पाचे कृषी व्यवसाय विशेषज्ञ रफिक नाईकवडी यांनी पुणे कृषी विभागाच्या सहसंचालकपदाचा (जेडीए) तात्पुरता पदभार स्वीकारला आहे. 

कृषी आयुक्तालयाच्या दैनंदिन कामकाजात पुणे ‘जेडीए’ पद अतिशय महत्त्वाचे समजले जाते. मंत्र्यांचे दौरे, मुंब्ईतील बैठका, पश्चिम महाराष्ट्रातील प्रशासकीय निर्णय तसेच आयुक्तांकडून स्थानिक पातळीवर होत असलेले दौरे व इतर कामकाजाच्या नियोजनात ‘जेडीए’ची भूमिका महत्त्वाची असते. त्यामुळेच नाशिकच्या कृषी सहंसचालकपदावर कार्यरत असलेले दिलीप झेंडे यांची काही महिन्यांत पुण्याच्या ‘जेडीए’पदी वर्णी लागली. 

“श्री. झेंडे सध्या व्यक्तिगत कारणामुळे महिनाभर रजेवर आहेत. त्यामुळे ‘जेडीए’चा पदभार श्री. नाईकवडी यांच्याकडे देण्यात आला आहे,” अशी माहिती सूत्रांनी दिली. पुण्याच्या ‘जेडीए’च्या अखत्यारित नगर, पुणे, सोलापूर अशी तीन महत्त्वाचे जिल्हे देण्यात आले आहेत. पुणे ‘जेडीए’ कार्यालयाचे आणखी एक वैशिष्ट्य म्हणजे राज्यातील कोणत्याही ‘जेडीए’ संलग्न  जिल्हा अधीक्षक कृषी अधिकारी (एसएओ) पदापेक्षा पुण्याचा ‘जेडीए’ संलग्न ‘एसएओ’ वजनदार समजला जातो. याच ‘एसएओ’पदावर दादासाहेब सप्रे यांनी प्रशासकीय हुकूमत ठेवली होती. 

“शासनाने ‘एसएओ’ श्री.सप्रे यांना ‘जेडीए’पदावर बढती दिली. विशेष म्हणजे बढतीवर नवे पद देतांना ‘मृदसंधारण’ विभागात दिले गेले आहे. त्यांच्या बदलीमुळे रिक्त झालेल्या पुण्याच्या जेडीए संलग्न ‘एसएओ’ पदावर श्री. नाईकवडी यांची वर्णी लागली. त्यांनी यापूर्वी राज्याच्या दक्षता विभागाचे प्रमुख म्हणून कारकीर्द गाजविली असून त्यांच्या काळात सुरू झालेल्या चौकश्या अजूनही सुरू आहेत.”, असे सूत्रांनी स्पष्ट केले. 

दक्षता पथकाच्या कारवाया राज्यभर वेग घेत असताना श्री. नाईकवडी यांची अचानक नानाजी देशमुख कृषी संजीवनी प्रकल्प अर्थात पोकरा प्रकल्पात झाली. माझी कोणीही बदली केली नसून मी स्वतःच वैयक्तिक कारणास्तव बदली करून घेतली, अशी भूमिका श्री. नाईकवडी यांनी त्या वेळी घेतली होती. आता तेच नाईकवडी पुन्हा ‘एसएओ’ म्हणून पुण्यात परतले आहेत. विशेष म्हणजे कृषी भवनात दक्षता पथकाच्या कार्यालयाला लागूनच त्यांचेही कार्यालय आहे.