स्वस्त धान्य दुकानांमधून दोन महिन्यांचे धान्य उपलब्ध होणार : मंत्री छगन भुजबळ

नाशिक  : राज्यात कोरोना विषाणूचा मुकाबला करण्यासाठी शासन सर्व स्तरांवर प्रयत्न करत आहे. या पार्श्वभूमीवर नागरिकांची सोय व्हावी म्हणून स्वस्त धान्य दुकानात एप्रिलसोबतच मे व जून महिन्याचे धान्य उपलब्ध करून देण्याचा निर्णय घेण्यात आला असल्याची माहिती अन्न,नागरी पुरवठा व ग्राहक संरक्षण मंत्री छगन भुजबळ यांनी दिली. 

श्री. भुजबळ म्हणाले, की राज्यात राष्ट्रीय अन्न सुरक्षा अधिनियम २०१३ ची अंमलबजावणी करण्यात येते. अंत्योदय अन्न योजनेखालील राज्यात २४ लाख ७ हजार ४६२ कुटुंबांना प्रतिमाह प्रतिशिधापत्रिका ३५ किलो धान्य आणि प्राधान्य कुटुंबातील ५ कोटी ४८ लाख ६० हजार ३३१ व्यक्तींना प्रतिव्यक्ती प्रतिमाह ५ किलो याप्रमाणात धान्य देण्यात येते. ३ रुपये प्रतीकिलो दराने तांदूळ आणि २ रुपये प्रतिकिलो दराने गहू उपलब्ध करून देण्यात येतो.

स्वस्त धान्य दुकानांमधून एप्रिल महिन्याच्या सोबतच मे व जून महिन्याचे धान्यही वाटप करण्यास सुरुवात केली जाणार आहे. कोरोना विषाणूचा प्रसार होऊ नये तसेच सार्वजनिक वितरण व्यवस्थेतील लाभार्थ्यांना संसर्ग होऊ नये, यासाठी प्रतिबंधात्मक उपाय म्हणून रास्तभाव दुकानातून शिधावस्तूचे वितरण करताना लाभार्थ्यांची बायोमेट्रिक पडताळणी न करता रास्तभाव दुकानदारांनी स्वत:चे आधार अधिप्रमाणीत करुन धान्यवाटपाची सुविधा ई-पॉस उपकरणावर उपलब्ध करण्यात येत आहे. यामुळे लाभार्थ्यांना ई-पॉस उपकरणावर बोट किंवा अंगठा लावण्याची आवश्यकता राहणार नसल्याचेही श्री. भुजबळ यांनी सांगितले.