पुणे जिल्हा परिषदेच्या घरबसल्या शिक्षण उपक्रमाला विद्यार्थ्यांचा प्रतिसाद

पुणे  : कोरोना विषाणूच्या संसर्गाला प्रतिबंध घालण्यासाठी संपूर्ण टाळेबंदी आणि संचारबंदी लागू करण्यात आली आहे. यामुळे जिल्ह्यातील शाळा, महाविद्यालये देखील बंद आहेत. या काळात विद्यार्थ्यांचे शैक्षणिक नुकसान होऊ नये, यासाठी जिल्हा परिषदेने घरबसल्या शिक्षण (लर्न अ‍ॅट होम) उपक्रम राबविला. या उपक्रमाला विद्यार्थ्यांचा चांगला प्रतिसाद मिळत आहे. पहिली ते आठवीच्या जवळपास १ लाख ३४ हजार ९७१ विद्यार्थ्यांनी सहभाग नोंदविला आहे, अशी माहिती मुख्य कार्यकारी अधिकारी आयुष प्रसाद यांनी दिली.

‘कोरोना’ची विद्यार्थ्यांना लागण होऊ नये, यासाठी जिल्ह्यातील सर्व शाळा बंद करण्यात आल्या आहेत. या काळात त्यांची अध्ययन प्रक्रिया सुरू राहण्याच्या दृष्टीने जिल्हा परिषदेने गृह अध्ययन प्रकल्पाअंतर्गत आराखडा तयार केला आहे. विद्यार्थ्यांनी २०१९-२० वर्षातील अभ्यासक्रमाचा सराव पूर्ण केल्यानंतर पुढील वर्षामध्ये येणाऱ्या विषयांची पूर्वतयारी होईल, असा अभ्यासक्रम या योजनेंतर्गत तयार करण्यात आला आहे. शाळेतील सर्व शिक्षकांमार्फत त्यांच्या वर्गातील विद्यार्थ्यांचा अभ्यास घेण्यात येणार आहे. याकामी पालकांनाही सहभागी करून घेत समाज माध्यमांद्वारे विद्यार्थ्यांना घरीच शिक्षण दिले जात आहे.

जिल्ह्यात इयत्ता १ ली ते ८ वीतील विद्यार्थ्यांची संख्या जवळपास १ लाख ९१ हजार ७५६ आहे. यातील १ लाख ३४ हजार ९७१ विद्यार्थ्यांनी १७७ केंद्रातून जिल्हा परिषदेने दिलेल्या लिंकवर नोंदणी केली आहे. सुट्यांमध्ये विद्यार्थ्यांकडून करून घेणाऱ्या गृहअध्ययन आराखड्यात दोन्ही सत्रातील अभ्यासक्रमाचा यात समावेश आहे.

कौशल्यावर आधारित असा अभ्यासक्रम तयार करण्यात आला आहे. यातील एक घटक दररोज अभ्यासाला घेतला जाणार आहे. सर्व अभ्यासक्रम पाठ्यपुस्तकातील असल्याने पुस्तके संदर्भ म्हणून वापरता येतील. पालकांनी दिक्षा अ‍ॅप मोबाईलवर डाऊनलोड करून घेतले असून पाठ्यपुस्तकातील क्युआर कोड स्कॅन करून घटकातील व्हिडिओ मुलांना दाखवून भाषण, वाचन, लेखन व भाषा समृद्धी याचा अभ्यास विद्यार्थ्यांकडून घरीच बसून केला जात असल्याचे प्रशासनातर्फे सांगण्यात आले.