सोलापुरात भाजपच्या आंदोलनाविरुद्ध शिवसेना, राष्ट्रवादीचेही आंदोलन

सोलापूर  ः राज्यात ‘कोरोना’चा वाढता प्रादुर्भाव रोखण्यात राज्यातील महाविकास आघाडीचे सरकार अपयशी ठरले आहे, याचा निषेध म्हणून सोलापुरात शुक्रवारी (ता.२२) भाजपच्या वतीने माझे अंगण, माझे रणांगण म्हणत घराच्या अंगणात काळ्या फिती दाखवत नेते, कार्यकर्त्यांनी निषेध आंदोलन केले. दुसरीकडे या आंदोलनाला विरोध करत शिवसेना आणि राष्ट्रवादी काँग्रेसनेही भगवे झेंडे दाखवत सरकारच्या कामाला पाठिंबा दर्शवला.

माजी सहकारमंत्री, आमदार सुभाष देशमुख यांनी जिल्हाध्यक्ष शहाजी पवार यांच्यासह त्यांच्या निवासस्थानी हे आंदोलन केले. तर महापौर श्रीकांचना यन्नम यांनी महापौर निवासस्थानी परिवारासह हे आंदोलन केले. आमदार देशमुख, महापौर यन्नम यांनी सरकारच्या कामावर नाराजी व्यक्त करताना सरकार कोरोनाला अटकाव करण्यात अपयशी ठरल्याचा आरोप केला. रुग्णसंख्या वरचेवर वाढतच आहे, पण सरकार गंभीर नसल्याचे सांगितले.

दुसरीकडे शिवसेनेचे जिल्हाध्यक्ष पुरुषोत्तम बरडे यांनीही कार्यकर्त्यांसह अवंती नगर येथील आपल्या निवासस्थानी भगवे झेंडे उंचावत सरकारला पाठिंबा दर्शवत भाजपचा निषेध केला. राष्ट्रवादी काँग्रेसचे शहराध्यक्ष भारत जाधव, संतोष पवार यांनी पक्षाच्या कार्यालयात पक्षाचे झेंडे दाखवून भाजपचा निषेध केला. दोन्ही बाजूंनी झालेल्या या आंदोलनाची लोकांमध्ये चांगलीच चर्चा रंगली. पण त्याहीपेक्षा राजकारण्यांच्या या पावित्र्यामुळे सर्वांनी करमणूक म्हणूनच याकडे पाहिल्याचे दिसले.