‘कोरोना’विरुद्धच्या लढाईसाठी माजी विद्यार्थ्यांकडून मदतीचा ओघ सुरुच

अकोला  ः डॉ. पंजाबराव देशमुख कृषी विद्यापीठाच्या माजी विद्यार्थ्यांनी ‘कोरोना’विरुद्धच्या लढाईला पाठबळ देण्यासाठी आर्थिक मदत सुरु ठेवली आहे. एए सिरीजच्या माजी विद्यार्थ्यांनी मुख्यमंत्री सहायता निधीला दोन लाख २२ हजार २२२ रुपयांची मदत केली आहे.

डॉ. पंजाबराव देशमुख कृषी विद्यापीठाअंतर्गत येणाऱ्या अकोला कृषी महाविद्यालय, नागपूर कृषी महाविद्यालय, अमरावती येथील श्री शिवाजी कृषी महाविद्यालय, वरोरा येथील आनंद निकेतन कृषी महाविद्यालय, उद्यान विद्या महाविद्यालय, वनविद्या महाविद्यालय, कृषी तांत्रिकी महाविद्यालय अकोला येथील या सीरिजच्या सर्व माजी विद्यार्थ्यांनी दोन लाख २२ हजार २२२ रुपये जमा केले. आतापर्यंत सर्व आजीमाजी विद्यार्थ्यांनी मिळून जवळपास २५ लाख जमा केले आहेत.

याबद्दल पालकमंत्री बच्चू कडू, आमदार रोहित पवार, नितीन देशमुख, जिल्हा परिषद अध्यक्ष चंद्रकांत ठाकरे, सिने कलावंत भारत गणेशपुरे, विद्यापीठाचे कुलगुरु डॉ. विलास भाले यांच्यासह सर्व संचालकांनी माजी विद्यार्थ्यांच्या कार्याचे कौतुक केले आहे.

कृषी अभियांत्रिकीच्या विद्यार्थ्यांचीही मदत ‘कोरोना’विरुद्ध उपाययोजनांसाठी डॉ. पंजाबराव देशमुख कृषी विद्यापीठाच्या कृषी अभियांत्रिकीच्या दहा विद्यार्थ्यांनी एक लाख रुपयांचा निधी जमा केला. हा निधी नुकताच मुख्यमंत्री सहायता निधीमध्ये देण्यात आल्याची माहिती डॉ. सुरेंद्र काळबांडे यांनी दिली.