पुणे जिल्ह्यात ४२ जणांना कोरोनाचा संसर्ग

पुणे   : शहराबरोबरच जिल्ह्याच्या ग्रामीण भागातही कोरोनाचा प्रादुर्भाव झाला आहे. जिल्ह्यातील पंचायत समिती आणि नगरपालिका क्षेत्रातील ४२ रुग्णांना कोरोनाची बाधा झाली आहे. यापैकी तीन जणांचा मृत्यू झाला असून, ११ जणांना यशस्वी उपचारांनंतर घरी सोडण्यात आले आहे. विविध रुग्णालयांमध्ये २८ जणांवर उपचार सुरू आहेत. शहरालगत तसेच नागरिकरण अधिक असलेल्या भागातच प्रमुख्याने कोरोनाचा प्रसार अधिक असल्याचे दिसून आले आहे. हवेली तालुक्यात सर्वाधिक २० रुग्ण आढळून आल्याचे जिल्हा प्रशासनातर्फे सांगण्यात आले.

जिल्ह्याच्या ग्रामीण भागात सोमवारी (ता.२७) पंचायत समिती क्षेत्रात ३५ कोरोना बाधित रुग्ण आढळून आले आहेत, तर नगरपालिका क्षेत्रात केवळ बारामतीमध्ये ७ रुग्ण आढळले आहेत. बारामती नगरपालिकेच्या हद्दीत एका रुग्णाचा मृत्यू झाला आहे. पाच रुग्णांवर उपचार करून घरी सोडण्यात आले असून, एका रुग्णावर उपचार सुरू आहेत. ग्रामीण भागाचा विचार करता शहरालगतच्या भागात असलेल्या व शहरात येणे-जाणे असलेल्या हवेलीमध्ये सर्वाधिक २० रुग्ण असून, यापैकी १८ रुग्ण उपचार घेत आहेत.

या शिवाय वेल्हा तालुक्यात ८ रुग्ण आढळून आले आहेत, त्यापैकी ७ रुग्णांवर सध्या उपाचर सुरू आहेत, तर एका रुग्णास घरी सोडण्यात आले आहे. शिरूर आणि भोरमध्ये प्रत्येकी २ रुग्ण आढळले असून, त्यापैकी शिरूर तालुक्यातील एकाचा मृत्यू झाला आहे. तर बारामती, जुन्नर आणि मुळशीमध्ये प्रत्येकी १ रुग्ण आढळून आले आहेत. बारामती तालुक्यात आढळलेल्या एकमेव रुग्णाचा मृत्यू झाला आहे. तर जुन्नर आणि मुळशीतील रुग्णावर यशस्वी उपचार करण्यात आले आहेत. आंबेगाव, दौंड, इंदापूर, खेड, मावळ आणि पुरंदर तालुक्यांमध्ये अद्याप कोरोनाचा एकही रुग्ण आढळलेला नाही.