पारंपरिक मच्छीमारांनी मांडल्या मत्स्य दुष्काळ परिषदेत व्यथा

सिंधुदुर्ग :  एलईडी, पर्ससीननेट, हायस्पीडसारख्या विध्वंसकारी मासेमारीमुळे जिल्ह्यातील किनारपट्टी लगतचा पांरपरिक मच्छीमार उद्‍ध्वस्त होत आहे. सरकारने केलेल्या कायद्याची अंमलबजावणी होत नसल्यामुळे अनधिकृत मासेमारी वाढली आहे, अशा व्यथा बहुतांशी मच्छीमारांनी मत्स्यदुष्काळ परिषदेत मांडल्या. सरतेशेवटी मुख्यमंत्री उद्धव ठाकरे जिल्हा दौऱ्यावर येत असून, याप्रश्‍नी त्यांची भेट घेण्याचे निश्‍चित करण्यात आले.

जिल्ह्यातील मच्छीमार आणि या व्यवसायावर आधारित असलेल्या सर्व घटकांची मत्स्यदुष्काळ परिषद दांडी (ता. मालवण) येथे समुद्रकिनारी झाली. परिषदेला आमदार वैभव नाईक, भाजपचे जिल्हाध्यक्ष राजन तेली, मच्छीमार नेते रमेश धुरी, नगराध्यक्ष महेश कांदळगावकर, नितीन तायशेटे, नितीन वाळके, बाबा मोंडकर, रेणुका कड, आनंद हुले, विकी चोपडेकर यांच्यासह शेकडो मच्छीमार उपस्थित होते. 

सरकारने अनधिकृत मासेमारी विरोधात कायदे केले आहेत. परंतु त्यांची कडक अंमलबजावणी होत नसल्यामुळे पांरपारिक पद्धतीने मासेमारी करणारे मच्छीमार आणि त्यांच्यावर अवलंबून व्यावसायिक आर्थिक संकटात सापडले आहेत. कर्जाचे हप्ते भरणे मच्छीमारांना शक्य होत नाही. त्यामुळे सरकारकडून हक्काच्या आधाराची गरज असल्याचे मत बहुतांशी मच्छीमारांनी या वेळी व्यक्त केले.मच्छीमार नेत्या आकांक्षा कांदळगावकर यांनी मच्छीमारांना सरसकट कर्जमाफी मिळावी, अशी मागणी केली.