‘किराणा मालाचा काळाबाजार बंद करा’

नगर ः ‘कोरोना’च्या संकटावर मात करण्यासाठी अनेक दानशूर व्यक्ती मदतीचा हात देत आहेत. दुसरीकडे मात्र, काही लोभी किराणा दुकानदार या संकटातही चढ्या भावाने मालाची विक्री करून काळाबाजार करीत आहेत. ही बाब निदर्शनास येताच, दुकानदारांनी अव्वाच्या सव्वा भावाने किराणा माल विकणे बंद करावे, अन्यथा गुन्हा दाखल करण्याचा सज्जड इशारा प्रशासनाने दिला आहे.

दिवसेंदिवस किराणा दुकानदारांकडून लूट होत असल्याच्या नागरिकांकडून तक्रारी आहेत. काही घाऊक व किरकोळ विक्रेत्यांनी अव्वाच्या सव्वा भावाने माल विकण्याचा धडाका लावला आहे. मात्र, प्रशासनाने तातडीने कडक पावले उचलत दुकानदारांना सक्त ताकीद दिली आहे. तहसील कार्यालयात नागरिकांच्या शंका समाधानासाठी नियंत्रण कक्ष स्थापन करण्यात आला आहे. या कक्षात सावेडी येथील अजय गायकवाड यांनी फोन करून, रेशन कार्ड नसून पत्नी, मुले उपाशी असल्याचे सांगितले. त्यावर तहसीलदार उमेश पाटील यांच्या निर्देशानुसार संबंधित कुटुंबाला अन्नधान्य घरपोच देण्यात आले. कोरोना विषाणूच्या प्रादुर्भावामुळे अशी अनेक कुटुंबे अडचणीत आहेत. तहसील कार्यालयाच्या समन्वयाने ९०० व्यक्तींना जेवणाची पाकिटे पुरविण्यात आली. तहसील कार्यालयात सुरू करण्यात आलेला नियंत्रण कक्ष २४ तास कार्यरत राहणार आहे. लोकांनी अडचणींसाठी ०२४१-२४११६०० या क्रमांकावर संपर्क साधावा, जेणे करून अडचणीचे प्रशासनाला निवारण करता येईल असे आवाहन केले आहे.