सोलापूरच्या पालकमंत्रीपदी जितेंद्र आव्हाड यांची नियुक्ती

सोलापूर  ः सोलापूर जिल्ह्याचे पालकमंत्री म्हणून डॉ. जितेंद्र आव्हाड यांची नियुक्ती करण्यात आली आहे. मावळते पालकमंत्री दिलीप वळसे पाटील हे स्वतःच या जबाबदारीसाठी इच्छूक नसल्याचे सांगितले जात होते. पण मंगळवारी अचानकपणे श्री. वळसे पाटील यांच्याकडील पदभार काढून श्री. आव्हाड यांच्याकडे देण्यात आला.

राष्ट्रवादी काँग्रेसचा बालेकिल्ला असणाऱ्या सोलापूर जिल्ह्यात लोकसभा निवडणुकीत माजी उपमुख्यमंत्री विजयसिंह मोहिते पाटील यांच्या गटाने भाजपमध्ये प्रवेश करुन राष्ट्रवादी काँग्रेसला मोठा धक्का दिला. त्यामुळे जिल्ह्यात राष्ट्रवादीची बरीच पडझाड झाली. त्यामुळे कामगारमंत्री वळसे पाटील यांच्या रुपाने पक्षातील ज्येष्ठ आणि अनुभवी मंत्री म्हणून सोलापूर जिल्ह्यावर त्यांचे विशेष लक्ष राहिल, या हेतुने वळसे पाटील यांच्याकडे पालकमंत्री म्हणून जबाबदारी दिली.

पण स्वतः वळसे पाटीलच ही जबाबदारी स्वीकारण्यास तयार नव्हते. पण त्यांना राजी करण्यात आले, त्यानंतर एक-दोन आढावा बैठका घेऊन त्यांनी कामकाज सुरु केले. पण म्हणावे तसे लक्ष ते जिल्ह्याकडे देऊ शकले नाहीत. सध्या ‘कोरोना’चे संकट सगळीकडे घोंघावत आहे. पण वळसे पाटील या सगळ्यात कोठेच दिसले नाहीत, याबाबतची नाराजीही काहींनी पक्षनेतृत्वाकडे व्यक्त केल्याचे सांगण्यात येते. पण आता अचानकपणे त्यांच्याकडील पदभार बदलून श्री. आव्हाड यांच्याकडे दिल्याने नेमक्या कोणत्या कारणाने हे घडले याची चर्चा सध्या सुरु आहे.