फडणवीस यांनी राजभवनावरच एखादी खोली घेऊन रहावे ः हसन मुश्रीफ

नगर  : ‘कोरोना’चे संकट असताना भाजप आंदोलनाच्या माध्यमातून राजकारण करण्यात मश्‍गूल आहे. परंतु ही राजकारण करण्याची वेळ नसून संकटावर मात करण्याची आहे. देवेंद्र फडणवीस तर सातत्याने राज्यपालांकडे जाऊन तक्रारींचा पाढा वाचत आहेत. त्यांना मलबार हिलवरून राजभवनावर जायला वेळ लागतो. त्यांनी राजभवनावर एखादी खोली घेऊन रहावे, असा टोला ग्रामविकासमंत्री तथा जिल्ह्याचे पालकमंत्री हसन मुश्रीफ यांनी विरोधी पक्ष नेते देवेंद्र फडणवीस यांना लगावला.

हसन मुश्रीफ यांनी गुरुवारी नगर येथे जिल्ह्यातील ‘कोरोना’ स्थितीचा आढावा घेतला. त्यानंतर ते पत्रकारांशी बोलत होते. ‘कोरोना’वर मात करण्यासाठी दोन महिन्यांपासून संघर्ष सुरू आहे. त्यात जिल्हा प्रशासन, नागरिकांचे सहकार्य असल्यामुळे जिल्ह्यात ‘कोरोना’ची परिस्थिती नियंत्रणाखाली आहे. मात्र, मुंबई-पुण्याचे लोक आल्यामुळे धोका वाढला आहे. लोकसभा अधिवेशन काळात ३५ लाख लोक विमानाने भारतात आले. ते मुंबई, दिल्ली, अहमदाबाद अशा सर्वच ठिकाणी गेले. त्यांना वेळीच क्वारंटाइन केले असते, तर १३५ कोटी लोकांना घरात बसावे लागले नसते, असा आरोपही मुश्रीफ यांनी यावेळी केंद्र सरकारवर केला.

रेशनकार्ड नसलेल्यांनाही मोफत तांदूळ अन्नसुरक्षा योजनेतून ८३ टक्के धान्यवाटपाचे काम पूर्ण झाले आहे. केंद्र सरकारने अर्धा किलो तूरडाळ व अर्धा किलो हरभरा डाळ देण्याचे निश्‍चित केले आहे. त्याचे वाटपही लवकरच सुरू होणार आहे. जिल्ह्यातील २५ हजार लोकांकडे रेशन कार्ड नाहीत. त्यांनाही प्रत्येकी पाच किलो तांदळाचे मोफत वाटप करण्यात येणार आहे, असे मुश्रीफ यांनी सांगितले.