अचलपूरमधील ४० ग्रामपंचायतींवर प्रशासक नियुक्तीचे आदेश 

अमरावती   ः ‘कोरोना’चा संसर्ग रोखण्यासाठी राज्यात लॉकडाउन जाहीर करण्यात आला आहे. संचारबंदी काळात निवडणूका घेणे शक्‍य नसल्याने अचलपूर तालुक्‍यातील ४० ग्रामपंचायतींवर प्रशासकाची नियुक्‍ती करण्याचे आदेश देण्यात आले आहेत. 

मुदत संपलेल्या अचलपूर तालुक्‍यातील ४० ग्रामपंचायतींसाठी २९ मार्चला निवडणूक होणार होती. त्यानुसार निवडणूक कार्यक्रमही जाहीर करण्यात आला होता. उमेदवारांच्या अर्जाची छाननी प्रक्रिया देखील पार पडली. यादरम्यान देशाअंतर्गंत ‘कोरोना’चा प्रादुर्भाव रोखण्यासाठी संचारबंदी जाहीर करण्यात आली. त्याचा फटका स्थानिक स्वराज्य संस्थांच्या निवडणूक कार्यक्रमालाही बसला आहे.

या निवडणूका अनिश्‍चित कालावधीसाठी स्थगित करण्यात आल्या आहेत. अचलपूर तालुक्‍यातील कांडली, परसापूर, निमकुंड, निंभारी, टवलार, घोडगाव, खरपी, नायगाव, एकलासपूर, धामणगाव गढी, हनवतखेडा, येवता, चौसाळा, खैरी, वडनेर, भुजंग, कविठा बु., दर्याबाद, येसुर्णा, कुष्ठा बु., कुष्ठा खुर्द, कोल्हा, अंबाडाकंडारी, नारायणपूर, रासेगाव, पथ्रोट, बोरगाव पेठ, शिंदी बु., वडगाव फत्तेपूर, सावळापूर, धोतरखेडा सालेपूर, बोरगाव दोरी, हरम आदी ग्रामपंचायतींची मुदत संपत असल्यामुळे तेथे प्रशासक नेमले जाणार असल्याची माहिती अचलपूर पंचायत समितीचे गटविकास अधिकारी जयंत बाबरे यांनी दिली.

यातील काही ग्रामपंचायतींवर बुधवारी (ता.६) तर काही ग्रामपंचायतींवर शनिवारी (ता.९) प्रशासकांची नियुक्‍ती केली जाणार आहे.