नागपूर, गडचिरोलीच्या जिल्हा पुरवठा अधिकाऱ्यांना निलंबित करा : मंत्री छगन भुजबळ

नाशिक: ‘कोरोना’च्या पार्श्वभूमीवर सुरु असलेल्या लॉकडाउनच्या काळात सार्वजनिक वितरण व्यवस्थेमार्फत लाभार्थ्यांना निकृष्ट प्रतीचा तांदूळ पुरविल्याने नागपूर व गडचिरोलीच्या जिल्हा पुरवठा अधिकाऱ्यांना निलंबित करून त्यांची खातेनिहाय चौकशी करावी, असे आदेश अन्न,नागरी पुरवठा व ग्राहक संरक्षण मंत्री छगन भुजबळ यांनी विभागाचे सचिव संजय खंदारे यांना दिले आहेत.

सार्वजनिक वितरण व्यवस्थेद्वारे वितरित होणाऱ्या धान्याची नियमितपणे पाहणी करीत असता. आता प्राप्त झालेल्या तांदूळ व डाळीचे नाशिक जिल्ह्यातील स्वस्त धान्य दुकानांमधून नमुने पाहणीसाठी मागवले असता त्यांना तांदळाचा दर्जा अत्यंत खराब असल्याचे निदर्शनास आले. याबाबत छगन भुजबळ यांनी नाशिक जिल्हा पुरवठा अधिकाऱ्यांकडून माहिती घेतली असता नाशिक जिल्ह्यात नागपूर येथील गोदामातून तांदूळ प्राप्त झालेला असून नागपूर गोदामात आलेला तांदूळ हा गडचिरोली जिल्ह्यातील राईस मिल मधून प्रक्रिया होऊन प्राप्त झाल्याची त्यांना माहिती मिळाली.

राज्यात लॉकडाउनच्या कालावधीत पात्र लाभार्थ्यांना निकृष्ट प्रतीचा तांदूळ पुरविल्याने शासनाची बदनामी होत आहे. तसेच गरजू लाभार्थी देखील लाभापासून वंचित राहत आहे. ही अतिशय गंभीर बाब त्यांनी सचिवांना निदर्शनास आणून देत निकृष्ट प्रतीचा तांदूळ ताब्यात घेऊन गोदामात साठवणुकीसाठी जबाबदार असणारे तपासणीस तसेच या कामी संनियंत्रण करण्यासाठी जबाबदार असलेले गडचिरोली आणि नागपूरच्या जिल्हा पुरवठा अधिकाऱ्यांना निलंबित करून त्यांची खातेनिहाय चौकशी करावी. तसेच ज्या राईस मिलमधून प्रक्रिया केलेला निकृष्ट प्रतीचा तांदूळ प्राप्त झालेला आहे, त्या राईस मिलवर जीवनावश्यक वस्तू कायद्यांतर्गत गुन्हा दाखल करावा व त्यांची मिलिंग परमिशन रद्द करण्यात यावी,असे आदेश त्यांनी सचिवांना दिले.

त्याचबरोबर राज्यातील अनेक जिल्ह्यांतून अशाच प्रकारच्या तक्रारी प्राप्त होत असल्याने राज्यस्तरीय उपनियंत्रक अंमलबजावणी आणि एफसीआय प्रतिनिधी यांच्या नियंत्रणाखाली संयुक्त तपासणी पथके तयार करून सर्व गोदामांची सखोल तपासणी करून तातडीने अहवाल सादर करण्यात यावा, असे आदेश मंत्री भुजबळ यांनी विभागाच्या सचिवांना दिले आहेत.