शेतकऱ्यांचा एल्गार मंत्रालयावर धडकेल  : राधाकृष्ण विखे पाटील

नगर  ः महाविकास आघाडी सरकारचे अस्तित्व राज्यात कुठेही नाही, मुख्यमंत्री फक्त एकमेकांचे रुसवे फुगवे काढण्यात व्यस्त आहेत. शेतकऱ्यांना कोणतिही मदत नाही पण मंत्र्यांसाठी गाड्या खरेदी करणाऱ्या या सरकारचे डोके ठिकाणावर आहे का हा प्रश्न आहे. सरकार पाडण्‍यात आम्‍हाला रस नाही, तुम्‍ही जनतेच्‍या मनातून केव्‍हाच पडले आहात, आता केवळ बैठकांचा फार्स करू नका. दूध उत्पादकांच्या मागण्या मान्य करा अन्यथा शेतकऱ्यांचा एल्गार मंत्रालयावर येऊन धडकेल, असा इशारा माजी मंत्री, आमदार राधाकृष्ण विखे पाटील यांनी दिला.

दूध उत्पादकांच्या मागण्यांसाठी आमदार विखे पाटील यांच्या नेतृत्वाखाली राहता तालुक्यातील दूध उत्पादक शेतकऱ्यांनी शनिवारी राहाता येथे नगर-मनमाड मार्गावर रास्तारोको आंदोलन केले. यावेळी विखे यांनी राज्य सरकारवर टिका केली.

ते म्हणाले, की सरकारमधील मंत्रीच दूध दरवाढ करण्यास विरोध करीत आहेत. राज्यात महाविकास आघाडी सरकारचे अस्तित्व कुठेही दिसत नाही. मुख्यमंत्री मुलाखतीतून शेतकऱ्यांच्या प्रश्नाची थट्टा करी आहेत. ‘कोरोना’च्या संकटात शेतकऱ्यांना कोणतीही मदत सरकार करू शकले. राज्यात युरियाचा काळा बाजार सुरू आहे. सोयाबीन बियाण्यात शेतकऱ्यांची फसवणूक झाली, पण एकाही खासगी कंपनीवर सरकारने गुन्हे दाखल केले नाहीत. दुबार पेरणीसाठी सरकारने शेतक-यांना कोणतीही मदत जाहीर केली नाही. राज्यातील सहकारी आणि खासगी दूध संघांनी शेतकऱ्यांकडील दूध १८ ते १९ रुपयांनी खरेदी करून त्यांची फसवणूक केली आहे.