‘कोरोना’च्या पार्श्वभूमीवर मिळणार ५ रुपयांत शिवभोजन ः छगन भुजबळ

नाशिक  : ‘कोरोना’च्या पार्श्वभूमीवर निर्माण झालेल्या परिस्थितीत राज्यातील गरीब, कामगार, शेतकरी, मजूर व विद्यार्थी उपाशी राहू नये, यासाठी शिवभोजन थाळी योजनेचा तालुकास्तरावर विस्तार करण्यात येत असून राज्यात दररोज सकाळी ११ ते ३ या वेळेत १ लाख शिवभोजन थाळीचे वितरण करण्यात येणार आहे, अशी माहिती अन्न, नागरी पुरवठा व ग्राहक संरक्षण मंत्री छगन भुजबळ यांनी दिली.

येथे रविवारी (ता.२९) आयोजित पत्रकार परिषदेत श्री. भुजबळ बोलत होते. ते म्हणाले, की राज्यातील गरीब, शेतकरी, मजूर व विद्यार्थी वर्गासाठी शासनाने केवळ पाच रुपयांमध्ये जेवण देण्याचा महत्वाकांक्षी निर्णय घेतला आहे. या योजनेचा तालुकास्तरावर विस्तार करण्यात आला असून प्रत्येक जिल्ह्यात देण्यात आलेल्या शिवभोजन थाळीच्या संख्येत पाचपट वाढ करण्यात आली आहे. शहरी भागासाठी प्रतिथाळी ४५ रुपये आणि ग्रामीण भागासाठी प्रतिथाळी ३० रुपये शासन देणार आहे. यासाठी शासनाने १६० कोटी रुपयांची तरतूद केली आहे.

नागरिकांच्या हाताला काम नसल्याने कुणाचीही उपासमार होऊ नये या उद्देशाने सवलतीचा पाच रुपये दर जूनपर्यंत लागू राहणार आहे. ‘कोरोना’च्या प्रादुर्भावामुळे कष्टकरी, असंघटित कामगार, स्थलांतरीत, बाहेरगावचे विद्यार्थी, बेघर नागरिकांचे हाल होत असल्याने शिवभोजन थाळी योजनेचा विस्तार करण्यात येत असून तालुकास्तरावर १ एप्रिलपर्यंत जिल्हाधिकारी आणि नियंत्रक शिधावाटप यांनी नव्याने शिव भोजनालय सुरू करावीत असे आदेश देण्यात आल्याचे त्यांनी सांगितले.

शिवभोजन केंद्र चालकांनी ग्राहकांना हात धुण्यासाठी साबण उपलब्ध करून देणे, तसेच भोजनालय दररोज निर्जंतुक करून घेण्याच्या सूचना देण्यात आल्या आहे. भोजनालय चालकांनी ग्राहकांना शक्यतो पॅकिंग स्वरूपात जेवण उपलब्ध करून देणे, जेवण तयार करण्याआधी हात किमान वीस सेकंद साबणाने स्वच्छ करणे, भोजन तयार करण्याची सर्व भांडी निर्जंतुक करून घेणे, भोजन तयार करणाऱ्या तसेच वाटप करणाऱ्या कर्मचाऱ्यांनी वारंवार साबणाने हात धुणे, भोजनालयातील सर्व कर्मचाऱ्यांनी मास्कचा वापर करणे त्याचबरोबर भोजनालय चालकाने प्रत्येक ग्राहकांमध्ये किमान तीन फूट अंतर राहिल याची दक्षता घ्यावी, अशा सूचना करण्यात आल्याचे श्री. भुजबळ यांनी सांगितले.