भुईबावडा परिसरातील तीन गावांना चक्रीवादळाचा तडाखा

सिंधुदुर्ग ः जिल्ह्यातील भुईबावडा (ता.वैभववाडी) परिसरातील तीन गावांना निसर्ग चक्रीवादळाचा तडाखा बसला. या वादळात तीन घरांचे नुकसान झाले. काही बागायतदारांची काजू झाडे उन्मळून पडली. अनेक ठिकाणच्या वीज वाहिन्या तुटून पडल्या. वादळामुळे वैभववाडी तालुक्यातील वीजपुरवठा खंडीत झाला होता. या चक्रीवादळामुळे जिल्ह्यातील २९ घरांचे नुकसान झाल्याची नोंद झाली आहे. जिल्ह्यात शुक्रवारी सकाळपासून अधूनमधून पावसाच्या सरी कोसळत होत्या.

वैभववाडी तालुक्यातील भुईबावडा, तिरवडे तर्फ खारेपाटण आणि हेत या तीन गावांना गुरूवारी (ता.४) सायकांळी उशिरा चक्रीवादळाचा तडाखा बसला. तिरवडेतील तीन आणि भुईबावडा गावातील दोन घरांचे नुकसान झाले.भुईबावडा येथील दिपक पांचाळ, तिरवडे तर्फ खारेपटण येथील श्रीधर तुकाराम कलमष्टे आणि रघुनाथ शंकर पवार या तिघांच्या घरांचे छप्पराचे नुकसान झाले. याशिवाय या तीनही गावांतील काजू बागांचे देखील नुकसान झाले आहे. या भागातील वीजखांब, वीज वाहिन्या तुटून पडल्या. या वादळामुळे तालुक्यातील वीज पुरवठा रात्री उशिरापर्यंत खंडीत झाला होता. भुईबावडा परिसरातील वीज पुरवठा खंडीतच होता. जोरदार वारे आणि मुसळधार पावसामुळे आत्तापर्यंत २९ घरांचे नुकसान झाल्याची नोंद जिल्हा प्रशासनाकडे झाली आहे.