बाहेरून येणाऱ्या प्रत्येक व्यक्तीला जामखेडमध्येच क्वारंटाइन करणार

नगर   ः एका क्षणी सर्वाधिक कोरोनाबाधित ते कोरोनामुक्त असा तालुक्‍याचा दोन महिन्यांचा प्रवास झाला. त्यामुळे यापुढे कोणताही धोका होऊ न देण्यासाठी मुंबई-पुण्यासह बाहेरून तालुक्‍यात येणाऱ्या प्रत्येक व्यक्तीला जामखेडमध्येच क्वारंटाइन करण्याच्या निर्णयावर शिक्कामोर्तब करण्यात आले आहे. त्यासाठी शहरातील शाळा-महाविद्यालयांच्या इमारती प्रशासनाने ताब्यात घेतल्या आहेत. या ठिकाणी पाण्याची, शौचालयांची व्यवस्था नसल्याने, ते बांधून देण्याची तयारी आमदार रोहित पवार यांनी दाखविली आहे. क्वारंटाइन होणाऱ्या सर्वांच्या दोन वेळच्या जेवणाची, नाश्‍त्याची सोयदेखील करण्याची ग्वाही आमदार पवार यांनी प्रशासनाला दिली.

मुंबई-पुण्यासह राज्याच्या विविध भागांतून येथे येणाऱ्या सर्व नागरिकांना त्यांच्या मूळ गावी क्वारंटाइन करण्याऐवजी जामखेड येथेच क्वारंटाइन करावे, अशी भूमिका व्यक्त झाल्यावर अधिकाऱ्यांच्या बैठका होऊन त्यावर एकमत झाले. प्रांताधिकारी अर्चना नष्टे यांनी हा प्रस्ताव स्वीकारला. तहसीलदार विशाल नाईकवाडे आणि तालुका आरोग्य अधिकारी डॉ. सुनील बोराडे यांनी आमदार रोहित पवार यांना माहिती दिली.

आमदार पवार यांनी जामखेडमध्ये क्वारंटाइन होणाऱ्या नागरिकांच्या जेवणाची, राहण्याच्या ठिकाणी शौचालये उभारण्याची जबाबदारी घेतली. त्यामुळे प्रशासनासमोर निर्माण झालेले पेच सुटले. तालुक्‍यात येणाऱ्या बाहेरच्या नागरिकांना जामखेड येथे क्वारंटाइन करण्यास सुरवातही झाली.

दरम्यान, तालुक्‍यातील पिंपळगाव (आळवा) येथील तिघांना आणि खर्डा येथील एकाला आरोग्य विभागाने शुक्रवारी ताब्यात घेतले होते. यापैकी पिंपळगाव येथील तिघांचेही अहवाल कोरोना निगेटिव्ह आले, तर खर्डा येथील एकाचा अहवाल प्राप्त होऊ शकला नाही.