सोलापुरातील आरोग्य सर्वेक्षणासाठी जिल्हा परिषदेचे ६०० कर्मचारी वर्ग

सोलापूर  ः सोलापूर शहरात कोरोनाचा प्रादुर्भाव वाढत असून, कोरोना बाधित परिसरातील नागरिकांच्या सर्वेक्षणाची मोहीम आरोग्य विभागातर्फे राबविण्यात येत आहे. त्या मोहिमेत महापालिका कर्मचाऱ्यांची यंत्रणा अपुरी पडत असल्याने आता जिल्हा परिदेतील विविध विभागांमधील ५९७ कर्मचाऱ्यांना सर्वेक्षणासाठी महापालिकेकडे वर्ग करण्यात आले आहे.

शहरातील कोरोना बाधित भागांसह, इतर परिसरातील लोकांचे आरोग्य सर्वेक्षण करण्यासाठी मोहीम राबविण्यात येत आहे. ही प्रक्रिया तातडीने पूर्ण करण्याचे आव्हान प्रशासनापुढे आहे. त्यासाठी जादाचे कर्मचारी कामाला लावून हे काम सुरु आहे. महापालिकेचे कर्मचारी ती मोहीम राबवत आहेत. पण कर्मचाऱ्यांची संख्या कमी पडत असल्याने संपूर्ण शहरातील सर्वेक्षणाला त्यांच्याकडून मर्यादा येत आहेत. त्यामुळे पालकमंत्री दत्ता भरणे यांनी दिलेल्या सूचनेनंतर त्यांच्या मदतीसाठी जिल्हा परिषदेतील कर्मचाऱ्यांची नियुक्ती करण्यात आली आहे.

जिल्हा परिषद प्राथमिक शिक्षण विभागातील १३० शिक्षक, महिला व बालकल्याण विभागाचे ३५ कर्मचारी या कामामध्ये आहेत. या आधीच आरोग्य विभागासह, संबंधित काही विभागातील कर्मचाऱ्यांना सर्वेक्षण मोहिमेसाठी वर्ग करण्यात आले. या सर्वेक्षणामध्ये बाधित भागातील प्रत्येक कुटुंबीयांचे नाव, बाहेरच्या गावातून कुणी आले असल्यास त्या संदर्भातील माहिती, ताप, खोकला व श्वसनाच्या विकारांबाबतची माहिती घेण्यात येत आहे.