दुधासाठी पाच रुपये अनुदान हवे 

पुणे: राज्यात शेतकऱ्यांकडून खरेदी केल्या जाणाऱ्या दुधाचे भाव प्रतिलिटर १९ रुपयांपर्यंत घसरले आहेत. त्यामुळे शासनाने पाच रुपये अनुदान योजना तत्काळ पुन्हा सुरू करावी, अशी मागणी डेअरी उद्योगाने केली आहे. 

महाराष्ट्र राज्य दूध उत्पादक व प्रक्रिया व्यावसायिक कल्याणकारी संघाचे अध्यक्ष गोपाळराव म्हस्के यांनी डेअरी उद्योगाची स्थिती चिंताजनक असल्याचे म्हटले आहे. कोरोना विषाणू साथीच्या पार्श्वभूमीवर सुरू असलेल्या लॉकडाऊनमुळे दूध विक्रीत घट झाली. दूध पावडरचे दर पडल्यामुळे पावडर प्रकल्पचालकांनीही दूध खरेदी घटविली आहे.  राज्यातील अनेक खासगी व्यावसायिक दूध उत्पादक प्रकल्पांनी गाय दुधाचे खरेदी दर १९ रुपयांपर्यंत खाली आणले आहेत. त्यामुळे आता स्थिती अजून उलटी झाली आहे. चांगले दूध देणाऱ्या व्यावसायिकांकडील दुधाचा पुरवठा वाढला आहे. परिणामी अतिरिक्त दुधाची समस्या उभी रहात आहे. त्यामुळे ‘दूध संकलन बंद’ प्रक्रिया राबविण्याशिवाय डेअरी प्रकल्पांना पर्याय राहिलेला नाही.  कोरोनानंतरच्या स्थितीत दूध व्यावसायिकांबरोबरच दूध उत्पादक शेतकरी संकटात आलेले आहेत. त्यामुळे शासनाने गाय दुधाचा खरेदी दर प्रतिलिटर २५ रुपये करून टॅंकरने दूध पुरवठा केल्यास अडीच रुपये वरकड खर्च देण्याचा निर्णय घ्यावा. गरज भासल्यास दूध खरेदीसाठी पाच रुपये अनुदान योजना राबवावी, असे दूध संघाचे म्हणणे आहे.