Agriculture Irrigation : अद्याप जिल्ह्यातील १० लाख हेक्टर क्षेत्र कोरडेच

Solapur News : पिढ्यानपिढ्यानं दुष्काळाच्या चटक्यांनी गलितगात्र झालेल्या दुष्काळी पट्ट्यामधील सोलापूर जिल्ह्याच्या (Solapur District) तब्बल नऊ तालुक्यांमध्ये जिल्ह्याची वरदायिनी असलेल्या महाकाय उजनी धरणानं (Ujani Dam) हरितक्रांती (Green Revolution), धवलक्रांती आणि औद्योगीक क्रांतीची पहाट आणली. पण अक्कलकोट आणि बार्शी तालुक्यासाठी उजनी धरण अद्याप ‘मृगजळ’ ठरत आहे.

या दोन्ही तालुक्यातील शेतीला उजनीचे पाणी मिळण्यासाठी उपसा सिंचन योजनांचे नियोजन करण्यात आले असले तरी अद्याप या योजना कार्यान्वित झालेल्या नाहीत. त्यामुळे या दोन तालुक्यांवर उजनीबाबत अन्याय झाला आहे.

इतर तालुक्यांच्या दृष्टिने बार्शी आणि अक्कलकोटसाठी उजनीचे पाणी हे वाकुल्या दाखविणारे ठरले आहे. दरम्यान दुष्कळी सोलापूर जिल्ह्यातील अद्याप अंदाजे दहा लाख हेक्टर क्षेत्र सिंचनाखाली येणे गरजेचे आहे.

उजनीवरील अर्धवट उपसा सिंचन योजना आणि महत्वाकांक्षी जलयुक्त शिवार योजना याद्वारे हे क्षेत्र ओलिताखाली येण्याची शाश्‍वती आहे. त्यासाठी गरज आहे ती प्रबळ राजकीय इच्छाशक्तीची आणि प्रशासनाच्या धडाकेबाज कर्तृत्वाची. त्यासाठी व्हीजन ठेऊन कृतिशील होण्याची गरज आहे.

सिंचनाची वास्तव स्थिती

प्रत्यक्ष उजनी धरणाच्या लाभामधून जिल्ह्यातील नऊ तालुक्यामधील १ लाख ४७ हजार हेक्टर क्षेत्र हे सिंचनाखाली आले आहे. शिवाय उपसा सिंचन आणि जिल्ह्याचे लघू-मोठे प्रकल्प यातून अंदाजे ५० हजार हेक्टर क्षेत्र ओलिताखाली आले आहे.

सोलापूर जिल्ह्याचे भौगोलिक क्षेत्र हे तब्बल अंदाजे १३ लाख हेक्टर इतके आहे. अद्याप १० लाख हेक्टर क्षेत्र ओलिताखाली येणे गरजेचे आहे. बार्शी आणि अक्कलकोट या दोन तालुक्यामधील शेतीला उजनीचे पाणी मिळण्यासाठी उपसा सिंचन योजनांच्या माध्यमातून नियोजन करण्यात आले आहे.

त्यासाठी उभारण्यात येत असलेल्या उपसा सिंचन योजनांची काम गतीने होण्याची गरज आहे. शिवाय जलयुक्त शिवार योजनेची यशस्वी अंमलबजावणी झाल्यास सकारात्मक परिणाम उमटतील.

सिंचनासाठी उजनी धरणाचा माळशिरस, मोहोळ, माढा, करमाळा, सांगोला, उत्तर सोलापूर, पंढरपूर, मंगळवेढा, दक्षिण सोलापूर या तालुक्यांनाच केवळ लाभ झाला आहे.