Government Fund : सोलापूर- पंढरपूर मार्गासाठी २० कोटी रुपयांचा निधी

टेंभुर्णी, जि. सोलापूर : सोलापूर-पंढरपूर मार्गावरील (Solapur Pandharpur Road) पंढरपूर- देगांव- चिंचोली- टाकळीसिकंदर- कुरुल ते राज्य मार्ग - २०२ ला जोडणारा प्रमुख जिल्हा मार्ग ६६ या रस्त्याचे काम रस्ते विशेष दुरुस्ती मधून होणार असून याकरिता वीस कोटी रुपयांचा निधी मंजूर झाला असल्याची माहिती आमदार बबनराव शिंदे (Bananrao Shinde) यांनी दिली.

आमदार बबनराव शिंदे म्हणाले, की महाराष्ट्राचे आराध्य दैवत श्री क्षेत्र पंढरपूर येथील श्री.विठ्ठल -रुक्मिणीच्या दर्शनासाठी राज्यातून लाखो भाविक पंढरपूर ला येत असून सोलापूर-पंढरपूर मार्गावरील पंढरपूर-देगांव-चिंचोली- टाकळी-सिकंदर-कुरुल ते राज्य मार्ग २०२ ला जोडणारा रस्ता प्रमुख जिल्हा मार्ग ६६ या रस्त्याची अवस्था अत्यंत खराब झाली आहे.

पंढरपूर व सोलापूर मुख्यालयास जोडणारा हा जवळचा मार्ग आहे. तसेच या रस्त्यावर साखर अनेक कारखान्यांची ऊस वाहतूक मोठ्या प्रमाणावर होत आहे. सध्या या रस्त्यांवर अनेक ठिकाणी खड्डे पडलेले असल्याने सातत्याने अपघात घडत आहेत. तसेच खराब रस्त्यामुळे परिसरातील नागरीकांना अनेक अडचणींना सामोरे जावे लागत आहे.

या रस्त्याच्या सुधारणेसाठी शासन स्तरावर वेळोवेळी पाठपुरावा सुरू होता. मागच्या अर्थ संकल्पीय अधिवेशनात या रस्त्याच्या दुरुस्तीसाठी निधी मंजूर करावा, या मागणीसाठी लक्षवेधी सूचना मांडली होती. तत्कालीन सार्वजनिक बांधकाम मंत्री अशोक चव्हाण यांनी मार्च २०२२ मध्ये मंत्रालयात संबंधित अधिकाऱ्यांची बैठक बोलावून या रस्त्याच्या दुरुस्तीस चाळीस कोटी रुपये निधी देण्यास मंजुरी देऊन तातडीने याबाबतचा प्रस्ताव शासनाकडे सादर करण्याची सूचना अधिकाऱ्यांना दिली होती.

आता विशेष दुरुस्ती अंतर्गत २० कोटी रुपये निधीचा प्रस्ताव शासनाकडे मंजूरीकरीता पाठविण्यात आला असल्याचे त्यांच्या निदर्शनास आणून दिले. त्यावेळी या रस्त्यास विशेष दुरुस्ती मधून सुधारणा करण्यात येईल, असे आश्वासन मिळाल्याचेही आमदार शिंदे यांनी सांगितले.