अंगणवाडीतील ३ लाख मुलांची होणार आरोग्य तपासणी

सासवड, जि. पुणे ः पुणे जिल्हा कुपोषणमुक्त (Malnutrition Free) करण्यासाठी जिल्हा परिषदेच्या (Pune ZP) माध्यमातून अंगणवाडीमधील ३ लाख २८ हजार मुलांची आरोग्य तपासणी (Health Checkup) करण्यात येणार आहे. या तपासणीनंतर आजारी असणाऱ्या मुलांवर तातडीने उपचार करून त्यांना सुदृढ करण्यासाठी प्रयत्न करण्यात येणार आहे, अशी माहिती जिल्हा परिषदेचे मुख्य कार्यकारी अधिकारी आयुष प्रसाद यांनी दिली.

कोथळे ( ता. पुरंदर ) येथे पुणे जिल्हा नियोजन समितीचे सदस्य प्रकाश भोईटे यांच्या विशेष प्रयत्नातून येथील भोसलेमळा अंगणवाडीचे उद्घाटन, तसेच स्वच्छ भारत मिशनअंतर्गत ६ लक्ष रुपये खर्चाचे रमाई विपीन मंदिर भूमिपूजन पुणे जिल्हा परिषदेचे मुख्य कार्यकारी अधिकारी आयुष्य प्रसाद यांच्या हस्ते करण्यात आले. या वेळी ते बोलत होते.

प्रसाद म्हणाले, ‘‘३ ते ६ वयोगटातील लहान बालकांना शिक्षण देणाऱ्या अंगणवाड्यांद्वारे शिक्षण आणि कुपोषण मुक्तीचे काम केले जाते. जिल्ह्यात ३ लाख २८ हजार मुले अंगणवाडीत शिक्षण घेत आहेत. यापैकी ३ लाख ११ हजार जणांची आरोग्य तपासणी करण्यात आली आहे. ४५० मुलांच्या तपासणीत सिद्ध झाल्यानंतर शस्त्रक्रिया करण्यात आल्या आहेत. जे आजार पालकांना माहीत नाही, ते आजार या तपासणीतून समोर आलेले आहेत.’’

या वेळी पुणे पत्रकार संघाचे अध्यक्ष प्रकाश भोईटे, भाजप पुरंदर तालुका अध्यक्ष गंगाराम जगदाळे, पुरंदरचे गट विकास अधिकारी अमर माने, पुणे रोहयो फळबाग लागवड समिती सदस्य राहुल भोसले, सासवड बार असोसिएशनचे अध्यक्ष धनंजय भोईटे, सरपंच अंकिता काळाणे,उपसरपंच वंदनाताई जगताप उपस्थित होते. कार्यक्रमाचे प्रास्ताविक संदीप जगताप आणि आभार तुषार काकडे यांनी मानले.