ॲग्रोवन वृत्तसेवा
जळगाव ः खानदेशात (Khandesh) चोपडा, जळगाव, जामनेर, धुळ्यातील शिरपूर आदी भागांतील कांदेबाग केळीची काढणी (Banana Harvesting) पूर्ण होत आली आहे. सध्या उशिरा लागवडीच्या बागांमध्ये काढणी सुरू आहे. कमी दर्जाच्या केळीला ७००, दर्जेदार केळीला १२०० ते १५०० रुपये प्रतिक्विंटलचा दर मिळत आहे.
केळीची पाठवणूक मुंबई, नागपूर, छत्तीसगड, राजस्थान, उत्तरेकडील पंजाब, काश्मीर, दिल्ली आदी भागांत सुरू आहे. मुंबई, नागपूर, छत्तीसगड, राजस्थान येथे कमी दर्जाच्या केळीची पाठवणूक केली जात आहे. या केळीला ७०० रुपये प्रतिक्विंटलचा दर आहे. दर्जेदार केळीची पाठवणूक पंजाब, दिल्ली येथील मॉल, काश्मीरमध्ये केली जात आहे. ज्या बागांत १० टनांपेक्षा अधिकची दर्जेदार केळी उपलब्ध होत आहेत, त्या बागांतील केळीला १५०० रुपये प्रतिक्विंटलपेक्षा अधिकचा दरही मिळत आहे.
सध्या केळीची आवक कमी होत आहे. ही आवक पुढे आणखी कमी होईल. कारण कांदेबाग केळी बागांमधील काढणी पूर्ण होईल. तसेच नवती केळीची काढणी फेब्रुवारीत सुरू होईल. सध्या खानदेशात प्रतिदिन १६० ट्रक (एक ट्रक १६ टन क्षमता) केळीची आवक होत आहे. या आवकेत मागील १५ ते १८ दिवसांत २० ट्रकनी घट झाली आहे. यामुळे दर स्थिर आहेत. मध्य प्रदेशातील बऱ्हाणपूर येथील बाजारातही प्रतिदिन १५० ट्रक केळीची आवक सध्या होत आहे. तेथेही कमाल दर १२०० ते १५०० रुपये प्रतिक्विंटल आहे.
जळगाव जिल्ह्यातील रावेर, मुक्ताईनगर, यावल या भागांत कांदेबाग केळीची लागवड कमी किंवाअत्यल्प असते. यामुळे या भागात केळीची आवक कमी आहे. काश्मीर, दिल्ली, पंजाबमधील खरेदीदार यावल तालुक्यातील फैजपूर, रावेरातील सावदा व परिसरातील एजंटच्या मदतीने केळीची चोपडा, जळगाव, पाचोरा, जामनेर व इतर भागांतून खरेदी करीत आहेत.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.