Old Pension Scheme : कृषी, महसूलची कामे खोळंबली

Old Pension Scheme छत्रपती संभाजीनगर : जुन्या पेन्शन योजनेसाठी मंगळवारपासून (ता.१४) पुकारण्यात आलेल्या बेमुदत संपात (Protest For Old Pension Scheme) प्रशासनाच्या कृषी (Agriculture Department), महसूलसह विविध विभागांतील तसेच जिल्हा परिषदेच्या कर्मचाऱ्यांनी सहभाग घेतला. त्यामुळे अनेक विभागांतील कामे खोळंबली तर कार्यालयात शुकशुकाट पाहायला मिळाला.

नव्या योजनेद्वारे दिले जाणारे निवृत्तिवेतन अत्यंत तुकडे आहे. त्यात वृद्धापकाळातील चरितार्थ भागविणे अवघड आहे.

त्यामुळे शेवटच्या वेतनाच्या निम्म्या रकमेची तरतूद असलेली १९८२ सालची जुनी पेन्शन योजना लागू करण्याच्या मागणीसाठी मंगळवारपासून बेमुदत संप पुकारण्यात आला आहे.

यासंदर्भात महाराष्ट्र राज्य कृषी सहायक संघटनेने १२ मार्चला कृषी आयुक्तांना निवेदन पाठवून संघटना संपात सहभागी होत असल्याचे कळविले होते, असे संघटनेचे सरचिटणीस शिवानंद आडे म्हणाले.

त्यानुसार कृषी विभागातील वर्ग तीन व चारचे कर्मचारी मंगळवारी संपात सहभागी झाले. ठिकठिकाणी महसूल कृषी व इतर विभागांच्या कर्मचाऱ्यांनी जोरदार घोषणाबाजी केली.