नाशिक : महापालिका आयुक्त अभिषेक कृष्ण यांच्यावर हात उगारणे, शासकीय कामात अडथळा आणि आणि अधिकाऱ्यासोबत गैरवर्तणूक प्रकरण माजी राज्यमंत्री बच्चू कडू यांना चांगलेच महागात पडले आहे.
नाशिकच्या सत्र न्यायालयाने या प्रकरणात शासकीय कामकाजात अडथळा प्रकरणी दोन वर्षांची शिक्षा ठोठावली आहे.
दरम्यान, विधिमंडळाचे अर्थसंकल्पीय अधिवेशन सुरू असले, तरीही आमदार कडू या सुनावणीसाठी उपस्थित होते.
त्यांना शिक्षा सुनावल्यावर लगेचच सत्र न्यायालयात जामिनासाठी अर्ज दाखल केला. न्यायालयाने त्यांना तात्पुरता जामीन मंजूर केला आहे.
२०१७ मध्ये नाशिक महापालिकेत दिव्यांगांच्या प्रश्‍नावर प्रहार संघटनेतर्फे त्यांनी आंदोलन झाले होते. दिव्यांगांच्या योजनांची अंमलबजावणी गांभीर्याने होत नाही.
त्यासाठी असलेला निधी का खर्च होत नाही. दिव्यांगांनी केलेल्या पत्रव्यवहाराला प्रतिसाद दिला जात नाही, अशा विविध तक्रारी होत्या. दिव्यांगासाठी आलेला काही निधी महापालिकेने खर्च न केल्याने तो शासनाला परत गेला होता. त्यावर आंदोलक चांगलेच तापले होते.
यासंदर्भात महापालिका आयुक्तांच्या दालनात झालेल्या चर्चेत वाद-विवाद झाल्यानंतर तत्कालीन महापालिका आयुक्त अभिषेक कृष्णा यांच्या उत्तराने समाधान न झाल्याने कडू यांनी आयुक्तांवर हात उगारला होता.
महापालिका आयुक्तांवर हात उगारल्याने त्याबाबत सरकारवाडा पोलिस ठाण्यात तक्रार करण्यात आली. त्यानुसार शासकीय कामकाजात अडथळा आणल्याप्रकरणी सरकारवाडा पोलिस स्टेशन गुन्हा दाखल करण्यात आला होता.
त्याची अंतिम सुनावणी बुधवारी (ता. ८) जिल्हा व सत्र न्यायालयात झाली. त्यात त्यांना शिक्षा सुनावण्यात आली.
शासकीय अधिकाऱ्यांकडून कायद्याचा गैरवापर ः कडू या संदर्भात कडू यांनी पत्रकारांशी बोलताना म्हणाले, भा.द.वि. ३५३ या शासकीय कामकाजात अडथळा या कलमाचा गैरवापर केला जात आहे. हा गंभीर प्रश्‍न झाला आहे. जनतेच्या प्रश्‍नांवर आंदोलन करणारे, पाठपुरावा करणाऱ्या कार्यकर्त्यांना त्याचा त्रास होतो.
याउलट काही शासकीय अधिकारी या कायद्याचा बचाव म्हणून वापर करतात ही खेदाची बाब आहे. सध्या विधिमंडळाचे अधिवेशन सुरू आहे. त्यामुळे शासकीय कामकाजात अडथळा या कायद्याचा जो गैरवापर होतो आहे. त्याकडे मी विधिमंडळाचे लक्ष वेधणार आहे.
त्यासाठी लक्षवेधी मांडण्याचा माझा विचार आहे, त्याबाबत लवकरच कार्यवाही करेन.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
