पारगाव : दत्तात्रेयनगर-पारगाव (ता. आंबेगाव) येथील भीमाशंकर सहकारी साखर कारखान्याचे (Bhimashankar Co-operative Sugar Factory) वजन काटे बिनचूक असल्याचा निर्वाळा वजन काटे तपासणीसाठी आलेल्या भरारी पथकातील सदस्यांनी अहवालात दिला आहे, अशी माहिती कारखान्याचे अध्यक्ष बाळासाहेब बेंडे यांनी दिली.
जिल्हाधिकाऱ्यांच्या आदेशानुसार पुण्याच्या वैधमापन भरारी पथकाचे प्रमुख संजीव कवरे व वैधमापन जुन्नर विभाग निरीक्षक प्रदीप बागडे यांच्या नेतृत्वाखालील पथकाने अचानक भेट देऊन भीमाशंकर कारखान्यातील वजन काट्यांची तपासणी केली.
या वेळी उसाने भरलेले ट्रक व बैलगाड्यांच्या वजनाची कसून तपासणी केली. उसाच्या वजनासाठी वापरण्यात येत असलेले वजन काटे प्रमाणित असल्याची शहानिशा केली.
यावेळी वजनात कोणत्याही प्रकारची तफावत आढळून आली नाही. या बाबतचा अहवाल त्यांनी कारखान्यास दिला. वजन काटे बिनचूक असल्याचा निर्वाळा भरारी पथकाने दिला. या वेळी ऊस उत्पादक शेतकरी, ऊस वाहतूकदार व वाहन चालक आदी उपस्थित होते.
बेंडे म्हणाले, ‘‘माजी गृहमंत्री व कारखान्याचे संस्थापक संचालक दिलीप वळसे-पाटील यांच्या मार्गदर्शनानुसार ऊस उत्पादक शेतकरी, सभासद यांचे हित सदैव डोळ्यासमोर ठेवून भीमाशंकर सहकारी साखर कारखाना चालविला जातो. ऊस उत्पादकांचा विश्वास हीच आमची प्रेरणा आहे.’’
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
