Nagpur News : शेतकरी गट, उत्पादक कंपनीच्या नावावर पारशिवणी येथील शिशुपाल चिखले नामक व्यक्‍तीने वसुली चालविल्याचा धक्‍कादायक प्रकार समोर आला आहे. या संदर्भाने फसवणूक झालेल्या शेतकऱ्यांनी कृषी विभागाकडे तक्रारी केल्यानंतर संबंधित व्यक्‍तीपासून सावध राहण्याची जाहीर सूचना कृषी विभागाने प्रसारित केली आहे.
विशेष म्हणजे शिशुपाल चिखले सभासद निधीच्या नावावर पैशाची वसुली करताना रोजगाराचे देखील आश्‍वासन देत असल्याचा आरोप आहे.
शेतकरी कंपनी, गट स्थापन करण्याकरिता नियमावली तयार करण्यात आली आहे. शेतकरी कंपनीचे सभासद होण्यासाठी शेतकऱ्यांकडून शेअर्सपोटी ठरावीक रक्‍कम घेतली जाते. त्याची रीतसर पावतीदेखील देण्याची पद्धत आहे.
मात्र पारशिवणी येथील शिशुपाल चिखले नामक व्यक्‍तीने अशाप्रकारची कोणतीही पावती न देता शेतकऱ्यांकडून प्रत्येकी एक हजार रुपये वसुलीचा सपाटा लावला आहे. पारशिवणी, कळमेश्‍वर, काटोल, नरखेड आणि वर्धा जिल्ह्यातील कारंजा, घाडगे तालुक्‍यांतील शेतकऱ्यांकडून त्याने ही वसुली केल्याची माहिती आहे.
यामध्ये फसवणूक झालेल्या शेतकऱ्यांनी मोबाईलवरून कृषी अधिकाऱ्यांशी संपर्क साधत अशा योजनेबाबत विचारणा केली. त्यानंतर या प्रकरणाचा भांडाफोड झाला. विशेष म्हणजे शेतकरी कंपनी, गटाच्या नावावर वसुली करणाऱ्या या व्यक्‍तीकडून रोजगाराचे देखील आश्‍वासन देण्यात येत आहे.
लोहारीसावंगा तसेच कारंजा घाडगे या भागातून वसुली संदर्भाने तक्रारी आल्या. संबंधित शिशुपाल चिखले नामक व्यक्‍ती प्रत्येकी एक हजार रुपये घेत त्याची कोणतीच पावती देत नसल्याचे शेतकऱ्यांनी सांगितले.
सोबतच रोजगार देण्याचे खोटे आश्‍वासनही तो देत आहे. परिणामी संबंधितापासून शेतकऱ्यांनी सावध राहात आपली फसवणूक टाळावी याकरिता जाहीर आवाहन केले आहे. याप्रकरणी लवकरच पोलिस तक्रार करण्याचे प्रस्तावित आहे. ३० ते ३५ लाख रुपयांचा अपहार संबंधितांनी केल्याची शंका आहे.
- रवींद्र मनोहरे, जिल्हा अधीक्षक कृषी अधिकारी, नागपूर
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
