Pune Unseasonal News : गेल्या आठवड्यापासून अवकाळी पावसाचा (Unseasonal Rain) दणका सुरूच आहे. शनिवारी (ता.१५) सायंकाळी जिल्ह्यातील शिरूर, हवेली, इंदापूर, दौंड, आंबेगाव, भोर, वेल्हा, मुळशी या भागांत जोरदार वाऱ्यासह जोरदार पाऊस झाला.
तर हवेलीतील कात्रज, आंबेगावमधील मंचर, अवसरी खुर्द, गावडेवाडी, जांभोरी आदी ठिकाणी गारपिटीच्या दणक्याने पिकांचे नुकसान (Crop Damage) झाले. त्यामुळे शेतकरी हतबल झाले.
पुणे जिल्ह्यात माळीणमध्ये १२.५ मि.मी, तर तळेगाव ८, पाषाण ४, शिवाजीनगर भागात २.४ मिलिमीटर पाऊस पडला. तर कात्रज भागात गारांचा अक्षरश सडा पडला. दहा ते बारा ठिकाणी झाडे कोसळली. आंबेगाव तालुक्यात जांभोरी परिसरात गारपिटीने करवंदे, आंबे, हिरडा आणि चाऱ्याचे मोठे नुकसान झाले.
तर पूर्व आंबेगाव भागातील पिंपळगाव खडकी, वळती, धामणी परिसरातही नुकसान झाले. वळतीतील होळीचामाळ बिरोबा मंदिर येथील शेतकरी लक्ष्मण भोर यांच्या घरांवरील काही लोखंडी पत्रे उडाले. मंचर, अवसरी, गावडेवाडी भागात मका, टोमॅटो, कोबी, फ्लॉवर, कांदा, तरकारी पिकांचे मोठे नुकसान झाले.
शिरूरमध्ये विद्युत वाहक तारा तुटून वीजप्रवाह खंडित झाला. इंदापूर तालुक्यातील अवसरी हद्दीत संतोष नरूटे यांच्या केळी पिकांचे मोठे नुकसान झाले. हातातोडांशी आलेले पीक वाया गेले. शासनाने पंचनामा करून तत्काळ मदत करावी, अशी मागणी संतोष नरूटे यांनी केली.
पूर्व शिरूर भागात गहू, कांद्याचे नुकसान
पूर्व शिरूर भागातील मांडवगण फराटा, वडगाव रासाई, इनामगाव, पिंपळसुटी, शिरसगाव काटा, आंधळगाव, कुरूळी आदा गावांत कांदा गहू काढणीचा हंगाम सुरू आहे. त्यामुळे शेतकऱ्यांची चांगलीच धांदल उडाली. काही ठिकाणी गहू, कांद्याचे मोठे नुकसान झाले. हवेलीच्या पश्चिम भागातही शेतकरी धास्तावले आहेत.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
