Unseasonal Rain छत्रपती संभाजीनगर : पाऊस मराठवाड्याची पाठ सोडताना दिसत नाही आहे. अंदाजाप्रमाणे पुन्हा एकदा शुक्रवारी (ता. २८) दुपारी अनेक भागांत वादळी वाऱ्यासह जोरदार पाऊस झाला. याचा फटका आंबा, मोसंबीसह उन्हाळी, रब्बीतील काढलेल्या पिकांना (Crop Damage) बसला आहे.
मराठवाड्यात पावसाचे सत्र थांबण्याचे नाव घेताना दिसत नाही. शुक्रवारी सकाळपर्यंतच्या २४ तासांत अनेक भागांत हजेरी लावणारा वादळी पाऊस शुक्रवारी दुपारपर्यंत देखील अनेक भागांत सुरूच होता.
छत्रपती संभाजीनगर जिल्ह्यातील चापानेर, टाकळी, राजेराय, पाचोड, लिंबे, जळगाव, गवळीशिवरा, महालगाव, शिवूर, गंगापूर, कायगाव यांसह सोयगाव तालुक्यातील तिडका, जरंडी आदी गाव शिवारांतही पावसाची वादळासह हजेरी कायम होती.
जालना जिल्ह्यातील अंकुश नगर, वडीगोद्री, गोंदी, पाथरवाला बुद्रुक, अंबड, शहागड आदी ठिकाणी वादळासह जोरदार पाऊस झाला. जिल्ह्यातील रामनगर व विरेगाव परिसरात गुरुवारी रात्री गारपीट झाली.
धाराशिव जिल्ह्यातील तुरोरी परिसरात गुरुवारी सायंकाळपासून अधून-मधून पावसाच्या सरी कोसळत होत्या. शुक्रवारी पहाटे व सकाळी पुन्हा एकदा जोरदार पावसाने हजेरी लावली. लातूर जिल्ह्यातील तांदुळजा मदनसुरी उजनी औराद शहाजानी गाव शिवारात वादळी पाऊस हजेरी लावली.
शेतीला तळ्याचे स्वरूप
जिल्ह्यातील औराद शहाजानी व परिसराला पावसाचा जोरदार तडाखा बसला. त्यामुळे शेतकऱ्यांचे अतोनात नुकसान झाले आहे.
तगरखेडा येथील शेतकरी राजाप्प व्यंकटराव कल्याणी (वय ५०) यांचा गुरुवारी वीज पडून मृत्यू झाला. शुक्रवारी सकाळी २४ तासांपर्यंत औराद शहाजनी येथील जलविज्ञान प्रकल्पात ६५ मिलिमीटर पावसाची नोंद झाली.
पावसाचा जोर जास्त असल्यामुळे लातूर-जहीराबाद महामार्गावरील जामखंडी येथे पूर आला. त्यात रस्ता वाहून गेला. पुलावरून पाणी गेल्याने वाहतूक ठप्प झाली. पाऊस खूप जोरदार असल्यामुळे शेतीला तळ्याचे स्वरूप आले होते.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
