Mandous Cyclone : चक्रीवादळ आज धडकणार

पुणे : बंगालचा उपसागरात गुरुवारी (ता. ८) ‘मनडूस’ चक्रीवादळाची (Mandous Cyclone) निर्मिती झाली आहे. पूर्व किनाऱ्याकडे झेपावत असलेली वादळी प्रणाली आज (ता. १०) सकाळपर्यंत पूर्व किनाऱ्यावरील पदुच्चेरी, श्रीहरिकोटा ते महाबलीपूरम दरम्यान किनाऱ्याला धडकणार आहे. या चक्रीवादळाच्या प्रभावामुळे महाराष्ट्रात पावसाची शक्यता (Rain Forecast) आहे.

बंगालच्या उपसागरात अंदमान समुद्राजवळ तयार झालेल्या कमी दाब क्षेत्राची तीव्रता वाढून गुरुवारी (ता. ८) ‘मनडूस’ चक्रीवादळ तयार झाले आहे. शुक्रवारी (ता. ९) सकाळपासून चक्रीवादळाची तीव्रता कमी होऊ लागली आहे.

दुपारी ही प्रणाली कारईकलपासून आग्नेयेकडे १८० किलोमीटर, तर चेन्नईपासून २६० किलोमीटर आग्नेयेकडे होती. चक्रीवादळामुळे तमिळनाडू, आंध्र प्रदेशसह, केरळ, तमिळनाडू, तेलगंणा, ओडिशा, श्रीलंकेत मुसळधार पाऊस पडत आहे.

महाराष्ट्रातही ढग जमा होत असून, आजपासून पावसाची शक्यता आहे. शुक्रवारी (ता. ९) मध्यरात्री ते आज (ता. १०) सकाळपर्यंत ताशी ६५ ते ८५ किमी वेगाने वाहणाऱ्या वाऱ्यासह हे वादळ उत्तर तमिळनाडू आणि दक्षिण आंध्रप्रदेशच्या किनाऱ्याला धडकेल.